ORV ta entrega sertifikado i diploma na graduadonan di Vastleggen Basis i Leidinggevende Politiemedewerkers
ORV ta entrega sertifikado i diploma na graduadonan di
Vastleggen Basis i Leidinggevende Politiemedewerkers
Willemstad – Djaweps 23 di yüli 2026, ORV a organisá un seremonia di Entrega di sertifikado i diploma na graduadonan di Vastleggen Basis (VLB) 2025-II, Operationeel Leidinggevende Politiemedewerkers (4L) i un graduado di Basis Politie Opleiding (BPO).
E seremonia a konta ku presensia di Direktora di ORV, Sra. Alpha Falbru, Hefe di Kuerpo Polisial Kòrsou, Sr. Raymond Ellis, Sèktor mènedjer pa estudionan post-inisial, Sr. Jowenny Troeman, koleganan di KPC, dosentenan di ORV i otro invitadonan.
Na petishon di College van Korpschefs, ORV den kolaborashon ku Politie Instituut Aruba (POI), a desaroyá e kurso di Vastleggen Basis (VLB) na aña 2025, pa fortalesé e abilidatnan di dokumentashon profeshonal den kuerpo polisial na Kòrsou, Aruba, Boneiru i St.Maarten. Durante e seremonia, kuater partisipante di Kòrsou a risibí nan sertifikado di kompetensia despues di a kompletá e kurso aki ku éksito.
Ademas, a tuma lugá e entrega di diploma na ocho graduado di e formashon Operationeel Leidinggevende Politiemedewerkers (4L). E grupo akí ta e promé grupo di funshonarionan di KPC ku a kompletá e trayekto di 4L na ORV. Durante e programa, e partisipantenan a desaroyá kompetensianan den liderazgo, komunikashon i solushoná problema, preparandonan pa asumí funshonnan ku mas responsabilidat den nan organisashon.
Durante e seremonia tambe a rekonosé e tres graduadonan kende a distinguí nan mes ku prestashonnan ekselente durante nan trayekto. E tres gruadadonan ta: Sr. Lendel Delfina di VLB 2025-II, Sr. Sharnelo Rojer i Sra. Najantra Webster di e klas di 4L.
Un momentu spesial durante e seremonia tabata e entrega di diploma na Sr. Burton van der Gen, ku ofisialmente a kompletá su Basis Politie Opleiding (BPO) 2024-I ku éksito.
ORV ta felisitá Kuerpo Polisial Kòrsou ku e gran logro di su empleadonan, i ta orguyoso di a kontribuí na e desaroyo di profeshonalnan den sektor di hustisia. Nos ta deseá tur graduado hopi éksito den nan trayekto profeshonal, i nos ta konfia ku nan lo sigui traha ku dedikashon, integridat i kompromiso den e funshon importante ku nan ta desempeñá den nos komunidat.
