Kòrsou ta konmemorá Dia Internashonal Kontra Trafikashon di Hende

Willemstad – djawebs 30 di yüli 2026, Kòrsou ta uní ku e komunidat internashonal pa konmemorá e Dia Internashonal Kontra Trafikashon di Hende, establesé pa Nashonnan Uní pa oumentá konosementu tokante trafikashon di hende, honra víktimanan i fortalesé esfuersonan global pa prevení e krímen grave aki di derechonan humano. E dia akί tambe ta pa rekonosé e kantidat di hende ku ainda ta sufri den silensio i ta keda leu for di bista di públiko, i pa konfirmá nos responsabilidat kolektivo pa protegé esnan vulnerabel y sostené sobrebitientenan.

Prevenshon di Abusu i Trafikashon di Hende (PATH), fundá na 2024, ta dediká na oumentá konsiensia públiko i promové kolaborashon den e lucha kontra tráfikashon di hende na Kòrsou. For di aña 2025, PATH ta traha tur aña huntu ku e Curacao Ports Authority (CPA) pa konmemorá e importante okashon aki pa medio di iluminashon históriko di Koningin Emmabrug den blou kla, e koló internashonalmente rekonosé pa e konsiensia tokante trafikashon di hende. Ademas lo pone bandera di PATH komo señal visibel di solidaridat ku víktima i sobreviviente i komo rekordashon di e esfuersonan huntu pa eliminá trafikashon di hende.

Pa okashon di e dia akí, e façade di Curaçao International Airport lo ta iluminá ku koló blou, danki na e kolaborashon ku Curaçao Airport Partners (CAP). E akshon simbóliko konhunto aki ta mustra e kompromiso nashonal den e lucha kontra trafikashon di hende i ta sirbi komo un yamamentu pa kreá mas konsientisashon tantu bou di habitantenan komo bishitantenan di nos isla.

E kolaborashon ku CAP a kuminsá na 2024. Den e sala di yegada di Curaçao International Airport tin e pianan di PATH, i den tur baño tin poster ku informashon pa hasi hende mas konsiente di traffikashon di hende.

E konmemorashon anual aki ta enfatisá e importansia di konsiensia públiko, kolaborashon entre instansianan i envolvishon di komunidat den detektashon i prevenshon di tráfikashon di hende. Tur hende tin un ròl pa hunga den rekonosé e señalnan di eksplotashon i sigurá ku víktima ta haña e protekshon i yudansa ku nan mester.

Hende ku tin informashon tokante aktividatnan sospechoso di tráfikashon di hende òf ku mester di yudansa ta ser animá pa bishitá http://www.path.cw òf tuma kontakto via 108 òf +599 9 679 7575. E timing di notifikashon i vigilansia di e komunidat ta esensial pa garantisá dignidat humano i pa sostené e esfuersonan kontinuo di Kòrsou pa kombatί trafikashon di hende.