Minister Middelhof ta hasi un bishita tékniko na 2Bays pa eksplorá e potensial di e segundo pilar ekonómiko.

Inisiativanan portuario, marítimo i industrial koherente ta ofresé oportunidat pa diversifikashon ekonómiko, empleo di kalidat haltu, i fortalesé kapasidat pa generá entrada pa Kòrsou. 

Willemstad – Durante un bishita di trabou na e área di 2BAYS, Minister di Desaroyo Ekonómiko Roderick Middelhof a sera konosí mas di aserka ku  e diferente aktividatnan ekonómiko eksistente i planifiká den i rondó di e área di haf di 2BAYS. E bishita ta konfirmá ku e área ta poseé potensial signifikante ku aktualmente no ta wòrdu utilisá sufisiente. 

E Minister ta enfatisá ku tin un oportunidat signifikante pa konektá programatikamente infrastruktura eksistente, flohonan residual, konosementu tékniko, i inisiativanan privá. Esaki por krea un ekosistema marítimo i industrial mas amplio den kua aktividatnan eksistente i nobo ta komplementá i reforsá otro.

Sitashon Minister:

“Kòrsou ta poseé di un infrastruktura industrial balioso, situá stratégikamente, konosementu tékniko i empresanan ku konosementu spesialisá ku ta interesá pa invertí. E reto ta pa aserkamentu  di e elementonan aki no ta den isolashon, sino pa konektá nan. Hustamente pasobra e aktividatnan ta komplementario ku otro, por surgi un ekosistema industrial i marítimo fuerte i dirigí riba futuro,” 

Oportunidatnan pa revitalisashon industrial

Durante e bishita, entre otro, a para ketu na e posibilidatnan pa duna un balor ekonómiko na e fluho di restu i residuo. Despues di mas investigashon tékniko, purifikashon i prosesamentu, sierto materialnan ku ta kontené grafit lo por sirbi komo materia prima òf komo base industrial den e kadena di balor di bateria. Ademas, sierto materialnan por haña aplikashon den industria farmaséutiko. Huntu ku e instalashonnan, terenonan i fasilidatnan tékniko eksistente, esaki ta brinda perspektiva pa desaroyo di aktividatnan industrial nobo di balor haltu.

E laboratorio eksistente riba tereno di 2BAYS tambe por brinda perspektiva pa aplikashonnan nobo, entre otro investigashon di material, kòntròl di kalidat, análisis kímiko i sosten di aktividatnan industrial i farmaséutiko. Den e siguiente fase ta investigá e posibilidatnan akí mas profundamente for di punto di bista tékniko i komersial.

Lokual a konstatá  durante e bishita di trabou ta kuadra direktamente ku e intenshon den e Programa di Gobernashon 2025–2029 pa revitalisá e sektor industrial di Kòrsou. Den e kuadro akí, e minister no ta enfoká solamente riba atrakshon di empresanan i invershonnan nobo, sino tambe eksplísitamente riba un mihó uzo i desaroyo di aktivonan, infrastruktura, konosementu, abilidat profeshonal i aktividatnan empresarial eksistente. Ku esaki ta aspirá na stimulá aktividatnan ekonómiko nobo, amplia e base industrial i fortalesé strukturalmentu e kapasidat duradero di Kòrsou pa kreá balor i generá entrada.

Ekspanshon di e klùster marítimo

Vários aktividat marítimo i industrial ta tumando lugá kaba den e área. Esakinan ta inkluí servisio marítimo riba laman (offshore), reparashon i mantenshon di barkunan mas chikí, servisio tékniko, sosten logístiko, i aktividatnan di bunkering.

E presensia di múltiple empresa spesialisá ta ofresé e oportunidat pa desaroyá un kadena di balor marítimo mas amplio. E kompanianan por utilisá e konosementu, fasilidatnan, personal i servisionan di otro. Esaki ta krea un klùster den kua e vários aktividatnan ta komplementá ku otro i por generá kolektivamente mas balor ekonómiko ku si nan tabata operá separá.

Inisiativanan privá konkreto, inkluyendo e aktividatnan planifiká di Navcarib i e desaroyo mas aleu di aktividatnan di bunkering, ta ser sperá di krea empleo direkto i indirekto di aproksimadamente 80 kupo. E desaroyo mas aleu di e inisiativanan aki mester kondusí tambe na kontraktnan adishonal pa kompanianan tékniko lokal, proveedónan, dunadónan di servisio logístiko, i otro empresanan.

Desaroyonan regional ta ofresé oportunidatnan signifikante pa esaki. E kresementu di e sektornan di energia, di offshore i marítimo na Guyana i Sürnam ta kondusí na un demanda kresiente pa reparashon di barku, sosten di offshore, servisio tékniko, sosten di ingenieria i logístika. Desaroyonan den futuro relashoná ku Venezuela tambe por krea oportunidatnan ekonómiko nobo pa Kòrsou. Den e konteksto aki, Kòrsou por posishoná su mes komo un sentro di servisio, mantenshon i logístika marítimo komplementario pa e region di sùit di Karibe. E isla su lokalidat stratégiko, infrastruktura di haf eksistente, i ekspertisio tékniko disponibel ta proveé ​​un punto di salida fuerte pa esaki.

Mesa Marítimo Programátiko (PMT) ta konektá e desaroyonan

E desaroyo mas aleu di e área ta ankrá den e aserkamentu programátiko mas amplio di e Mesa Marítimo Programátiko Dok-Buskabaai. E struktura di kolaborashon públiko- privá aki, establesé pa e minister di Desaroyo Ekonómiko, ta trese huntu gobièrnu, kompanianan di gobièrnu, empresanan privá, i otro partnernan relevante.

E PMT ta sirbi komo un plataforma pa programashon, kordinashon, preparashon di invershon i monitoria konhunto. Esaki ta evitá ku proyektonan ta wòrdu desaroyá den isolashon. Desaroyo di maneho di infrastruktura, finansiamentu, invershonnan privá, entrenamentu i implementashon ta mará mas tantu posibel denter di un solo liña di desaroyo koherente. Hasiendo esaki, PMT ta sostené e desaroyo di e Koridor di Desaroyo Ekonómiko di Dok-Buskabaai mas amplio. Den e koredó aki, reparashon di barku, servisio offshore, logístika, aktividat industrial, energia, ekonomia sirkular, inovashon i entrenamentu profeshonal por reforsá otro mutuamente.

Sitashon di Minister

“Pa medio di e Mesa Marítimo Programátiko, nos ta trese partidonan públiko i privá huntu. E invershonnan i inisiativanan individual mester bira finalmente parti di un klùster marítimo i industrial koherente. Di e manera aki, nos ta oumentá e impakto ekonómiko i sigurá ku e oportunidatnan disponibel realmente ta benefisiá Kòrsou,”

Desaroyonan riba i rondó di Bullenbaai

Desaroyonan tambe ta planiá riba i rondó di Bullenbaai ku por kontribuí na mas ampliashon di e base ekonómiko. E kombinashon di aktividatnan di haf, infrastruktura relashoná ku energia, servisionan industrial, i formanan nobo di produkshon ta ofresé oportunidatnan pa invershonnan privá adishonal. Un di e inisiativanan planiá ta konserní krio di piská riba tera, di kua realisashon ta antisipá pa 2028. E desaroyo aki por kontribuí na inovashon i empleo i ta kuadra ku e strategia di eksportashon di e Ministerio. Na mes momento, e por utilisá fasilidatnan industrial, logístiko, di awa i di energia eksistente.

Empleo di kalidat haltu pa e poblashon lokal

E desaroyonan nobo ta ofresé perspektivanan pa trabounan ku un balor agregá relativamente haltu. Ehèmpelnan ta inkluí posishonnan pa lasdó sertifiká, ingenieronan mekániko, téknikonan di laboratorio, ingenieronan, spesialistanan di mantenshon, profeshonalnan marítimo, i empleadonan den e terenonan di kòntròl di kalidat i logístika.

Ademas, kuponan di trabou indirekto tambe lo wòrdu kreá na kontratistanan lokal, kompanianan di transporte, proveedónan, kompanianan di seguridat, institutonan di entrenamentu, i dunadónan di servisio di negoshi. Segun e Minister, ta esensial pa trahadónan i hóbennan lokal ta prepará na tèmpo pa e posishonnan ku por surgi for di e desaroyonan aki. P’esei, den kuadro di e PMT i den kolaborashon ku kompanianan di haf privá i partnernan di entrenamentu relevante, 2BAYS lo traha riba kursonan di entrenamentu spesífiko, entrenamentu práktiko, i trayektonan di sertifikashon.

Sita di e Minister:

“Nos mester evitá ku oportunidatnan ekonómiko nobo ta surgi sin ku nos propio hendenan ta sufisiente prepará pa benefisiá di e oportunidatnan aki. P’esei e desaroyo di e área mester bai man den man ku edukashon dirigí, entrenamentu, i eksperensia práktiko pa e poblashon lokal, i en partikular pa nos hubentut.”

Hóbennan introdusí na e ekonomia di futuro

Aktualmente e Minister a ofresé diesun hóben e oportunidat pa hasi trabounan di fakansi na ministerio di Desaroyo Ekonómiko. E meta di esaki ta pa introdusí nan na e trabou di e ministerio i pa duna nan un bista riba e relashon entre maneho ekonómiko, empresario, invershonnan i empleo.

Den e kuadro aki, Ichelon Simmons i Alexia de Jesus a registrá nan mes pa sigui e Minister pa un dia. Tambe nan tabata presente na e bishita di trabou na 2BAYS i por a skucha direktamente di e tim di maneho tokante e desaroyonan ku ta tumando lugá i e oportunidatnan di karera profeshonal ku lo por surgi den futuro komo resultado. E Minister ta konsiderá importante pa hóbennan no solamente siña tokante desaroyo ekonómiko den teoria pero tambe konosé kompanianan, profeshonnan tékniko, i sektornan di kresementu den futuro personalmente. 

Gobièrnu komo fasilitado  ku ta konektá

E Minister a enfatisá ku invershonnan primario i aktividatnan ekonómiko mester ta originá for di e komunidat empresarial. Den e sentido aki, e gobièrnu ta hunga un ròl di fasilitá, konektá i krea e kondishonnan nesesario. Esaki ta enserá, entre otro, promové koperashon, yuda solushoná e desafionan di invershon, desaroyá infrastruktura públiko stratégikamente, i kontribuí na e aliniashon entre enseñansa i merkado laboral.

Sitashon Minister:

“Kòrsou tin un potensial grandi, pero nos mester kapitalisá aktivamente riba dje. Komo Minister di Desaroyo Ekonómiko, mi ta sostené inisiativanan duradero i ekonómikamente responsabel ku ta mobilisá invershonnan privá, krea empleo di kalidat haltu, i kontribuí na fortalesé e kapasidat pa generá entrada pa Kòrsou.”

Minister Middelhof ta indiká ku, desaroyonan den i rondó di 2BAYS ta demostrá ku servisio marítimo, reparashon di barku, sosten riba laman, aktividatnan di bunkering, produkshon industrial, servisio di laboratorio, aplikashonnan sirkular, energia, i produkshon agrario inovativo por komplementá otro. Dor di desaroyá e inisiativanan aki na un manera kordiná i guia nan programátikamente pa medio di e PMT, e área por krese riba término kòrtiku i mediano den un motor grandi pa revitalisashon industrial, diversifikashon ekonómiko, i empleo di kalidat haltu riba Kòrsou.