Nombramentu temporal di direktor interino di CORE ta garantisá kontinuidat durante e fase di investigashon

WILLEMSTAD – Gobièrnu di Kòrsou, den su kapasidat komo akshonista di CORE N.V., a nombra temporalmente señor A. Magdalena komo direktor general statutario di CORE N.V. pa garantisá kontinuidat den e maneho di e organisashon durante un importante fase di investigashon i transishon.

E nombramentu ta sigui e penshun di e direktor general na 31 di yüli 2026 i ta tuma lugá den un periodo den kua ta eksistí un investigashon tokante un fushon stratégiko proponé entre CORE i Blue NAP. E investigashon lo mester determiná si un fushon ta deseabel i, si asina, di kua forma esaki por wòrdu realisá di e mihó manera. E nombramentu interino tin komo meta garantisá kontinuidat den e maneho di CORE durante e fase di investigashon i toma di desishon.

E nombramentu temporal lo ta bálido pa e durashon di e investigashon tokante e fushon stratégiko proponé entre CORE i Blue NAP. E investigashon lo ser finalisá pa mas tardá den un aña. Basá riba e resultadonan, lo wòrdu disidí si e fushon lo sigui dilanti i, si asina, kon lo wòrdu implementá.

Promé ku e nombramentu, a sigui un proseso di toma di desishon kuidadoso. Despues di e proposishon di e hunta di komisario, a presentá esaki na Konseho di Minister i na Buro di Supervishon i Normalisashon di Entidatnan Gubernamental (SBTNO). Ademas, SOAB a ehersé un assessment independiente ku a konkluí ku señor Magdalena ta apto pa e funshon i ku e ta disponé di e konosementu, eksperensia i kualidatnan di liderazgo nesesario.

Den e toma di desishon, e akshonista tambe a duna aun mas peso na e echo ku señor Magdalena, den su funshon komo presidente di e Hunta di Komisario, konosé e organisashon i e expediente-nan stratégiko ku ta kanando kaba. Esaki ta permití p’e asumí e liderato mesora, sin un periodo largu di adaptashon, i garantisá kontinuidat den e operashonnan.

Aunke SBTNO a emití un konseho diferente, Minister di Gobernashon, Planifikashon i Servisio Públiko, mr. Shalten Hato, despues di ku Konseho di Minister a tuma un desishon al respekto, a tuma desishon ku motibunan bon fundá pa tuma un desishon diferente. Segun e Ordenansa Good Corporate Governance, esaki ta posibel ora e interes di pais ta hustifiká. E akshonista a evaluá kuidadosamente e opshon proponé pa laga e Hunta di Komisario asumí temporalmente e maneho. Sin embargo, a konkluí ku kontinuidat di e operashonnan, e maneho diario di CORE i e ehekushon di e investigashon ta eksihí un direktor ku por dediká su atenshon kompleto na e liderato operashonal di e empresa. Ademas, un periodo largu di maneho pa e Hunta di Komisario lo por afektá e separashon entre maneho i supervishon, ku ta un prinsipio importante di bon gobernashon korporativo (good corporate governance).

Pa evitá kualke aparensia di konflikto di interes, señor Magdalena lo pone su funshon komo presidente i miembro di e Hunta di Komisario na un lado durante su nombramentu komo direktor interino. Di e manera aki ta keda un separashon kla entre maneho i supervishon.

E Minister di Gobernashon, Planifikashon i Servisio Públiko ta enfatisá ku e nombramentu ta estriktamente temporal:

“Bon gobernashon ta eksihí prosedimentunan kuidadoso, pero tambe responsabilidat ora kontinuidat di un organisashon ta pidi esaki. Si e resultadonan di e investigashon duna motibu pa esaki, despues ku e investigashon tokante un eventual fushon a finalisá, lo kuminsá un prosedimentu habrí, regular i transparente pa nombra un direktor general definitivo.”

[FIN DI KOMUNIKADO]