WoMen’s Steering Committee Curaçao ku eksitoso workshop tokante plantamentu

WoMen’s Steering Committee Curaçao ku eksitoso workshop tokante plantamentu

WILLEMSTAD – WoMen’s Steering Committee Curaçao a tene otro eksitoso workshop djasabra último, dia 1 di ougùstus. E charla di e dia ei a hiba komo tema “Den bo mes kurá”, i a keda presentá pa sr. Gerritson Doran.

Durante e mainta informativo aki, sr. Doran alabes a duna un workshop, ku ‘tips & tools’ kon pa planta den nan propio kurá. E mensahe di mas importante di e dia tabata ku bo no mester di tereno grandi pa por kuminsá ku bo propio plantashon, pero por kuminsá ku djis un huki den bo mes kurá pa kosechá fruta i bèrdura.

Sr. Doran a duna informashon práktiko tokante e diferente maneranan pa atendé ku stèk di mata, kon pa trata ku simia, i tambe kon pa identifiká i atendé ku diferente tipo di malesa ku por afektá bo plantashon. Na final di e workshop tur partisipante a haña un baki ku tera ku simia ku nan a planta pa sigui kultivá esaki den kurpa di nan kas. 

Presidente di WSCC, sra. Miriëta Lourens-de Lanoy a sera e mainta ku e konseho:  

“Kuminsá awe pa kosechá mañan. Kasi nos tur tin un pida kurá kaminda nos por planta.  Banda ku e ta un hòbi dushi, bo ta wak e resultado tambe den bo pòtmòni.”

Pa e siman aki, WSCC tin dos charla mas planiá:

• Djamars 4 di ougùstes – Kuida awe, disfrutá mañan ku moderadó sra. Angeline de Ron di Fundashon Sinta Ros
• Djasabra 8 di ougùstes – Kousa -i faktornan di riesgo di Alzheimer ku moderadó sra. Chanerika Hellement di Fundashon Alzheimer 

E charlanan ta grátis pero mester registrá pa sigurá bo stul. Por hasi esaki via E-mail info@steeringcommitteecuracao.org òf WhatsApp +5999 510 8159 / +5999 512 8467

Pa mas informashon sigui informashon via di media tradishonal i página di ret sosial di WoMen’s Steering Committee Curaçao.