Preguntanan segun artíkulo 96 di Reglamentu di Òrdu tokante dokumentashon, preservashon i promoshon di e legado di Mundial FIFA 2026 i Blue Wave
Minister di Enseñansa, Siensia, Kultura & Deporte
Sr. Sithree van Heydoorn
Fort Amsterdam z/n
Kòrsou
4 di ougùstùs 2026
Tópiko: Preguntanan segun artíkulo 96 di Reglamentu di Òrdu tokante dokumentashon, preservashon i promoshon di e legado di Mundial FIFA 2026 i Blue Wave
Apresiabel señor
Suskrito, miembro di frakshon di Movementu Futuro Kòrsou den Parlamento di Kòrsou, Ishahier Monte, ta pidi bo atenshon pa lo siguiente.
Partisipashon di Kòrsou na Mundial FIFA 2026 a representá un momento históriko den desaroyo di nos deporte i den e posishonamentu internashonal di nos pais. E prestashon aki no solamente a pone Kòrsou riba mapa mundial di futbòl, sino tambe a demostrá ku, ku vishon, disiplina i invershon den talento lokal, nos por kompetí na e nivel mas haltu di deporte mundial.
Kòrsou a skirbi un kapítulo nobo den su historia dor di bira e pais mas chikí ku a klasifiká pa un Mundial di FIFA. E prestashon históriko aki, ofisialmente rekonosé den Guinness World Records, no solamente ta un triunfo deportivo, sino tambe un kontribushon importante na e posishonamentu stratégiko, e visibilidat internashonal i e reputashon di nos pais riba e esenario mundial.
Sinembargo, e logro históriko aki no a nase den un solo momento. E no a kuminsá ku e dia di klasifikashon, ni ora nos himno a resoná den stadion, ni ku e promé pitaso di e mundial. Tur gran prestashon tin un historia ku no semper ta visibel: un historia di vishon, liderato, planifikashon, resilensia, sakrifisio i trabou den ekipo. E fruta ku mundu a mira tabata simplemente e resultado di e simianan ku a wòrdu sembrá hopi promé.
Ta hustu tambe pa rekonosé i gradisí tur esnan ku, den forma direkto òf indirekto, a kontribuí na e logro históriko aki. Tur e esfuersonan kolektivo aki a kristalisá den e klasifikashon pa Mundial FIFA 2026 i den e movementu nashonal ku a bira konosí komo Blue Wave. Blue Wave no a limitá su influensia na e tereno di futbòl. El a bira un ekspreshon di unidat nashonal, demostrando ku Kòrsou por mobilisá su pueblo rondó di un meta komun, pone diferensianan un banda i transformá un prestashon deportivo den un fuente di orguyo, identidat nashonal i sentido di pertenensia.
Suskrito ta konsiderá ku Gobièrnu mester mira e prestashon históriko aki no solamente komo un logro deportivo, sino tambe komo un parti di nos patrimonio nashonal. P’esei, e historia aki no mester keda limitá na grabashonnan los, publikashonnan riba media sosial, reportahenan di prensa òf memoria individual. E ta meresé un proseso strukturá di investigashon, dokumentashon i konservashon, ku un dokumentario por forma un elemento sentral den e preservashon di e legado históriko i sosial di e klasifikashon pa Mundial FIFA 2026.
P’esei, suskrito ta interesá pa sa kon Gobièrnu ta mira e idea di realisá un dokumentario profeshonal ku no solamente ta konta e historia di un klasifikashon, sino tambe e historia di un soño ku a bira realidat. Un dokumentario ku ta sigui e trayekto for di e vishon, e sakrifisionan, e desaroyo durante e añanan i e klasifikashon históriko pa Mundial FIFA 2026. Di mes manera, e fenómeno Blue Wave no por falta, pasobra el a bira e refleho di un pueblo ku a topa unidat, orguyo i speransa na un momento históriko.
Un dokumentario di e naturalesa aki por bira un legado di gran balor pa generashonnan presente i futuro. Ademas di konservá un kapítulo úniko den historia di nos deporte i nos pais, e por funshoná komo un instrumento edukashonal ku ta inspirá hóbennan den balornan manera liderato, perseveransia, disiplina, identidat nashonal, resilensia i trabou den ekipo.
Di mes manera, suskrito ta kere ku ta di gran importansia pa identifiká, inventarisá, konservá i protehá tur e material históriko relashoná ku e trayekto aki — manera grabashonnan oudiovisual, fotonan, entrevistanan, dokumentonan, korespondensia i otro fuente relevante — pa asina preservá e memoria kolektivo di e prestashon históriko aki i garantisá ku e legado ei keda disponibel pa investigashon, edukashon i inspirashon di generashonnan ku lo sigui.
Suskrito ta kere tambe ku lo ta un momento di gran balor simbóliko i kultural pa estrená e dokumentario durante Curaçao International Film Festival (CIFF). Komo un festival ku ta duna un plataforma na dokumentarionan i produkshonnan internashonal, ku atenshon spesial pa bosnan di Karibe i Latinoamérika, CIFF ta ofresé e esenario ideal pa presentá e historia di Blue Wave na un públiko tantu lokal komo internashonal. Un estreno den e kuadro aki lo kontribuí na un presentashon digno, profeshonal i di nivel internashonal di e legado históriko ku e trayekto aki a representá pa Kòrsou.
Ademas, suskrito ta proponé pa e dokumentario wòrdu pone disponibel i rekomendá komo material edukashonal den nos skolnan, pa asina permití ku e historia i e balornan ku e ta representá por inspirá i eduká e generashonnan nobo.
Finalmente, suskrito ta konsiderá ku Gobièrnu por atribuí un papel importante na Museo di Kòrsou i Archivo Nashonal Kòrsou pa koordiná e identifikashon, kolekshon, dokumentashon i konservashon di tur material históriko relevante relashoná ku e trayekto aki. Asina, e legado di e klasifikashon históriko pa Mundial FIFA 2026 no solamente lo wòrdu preservá komo patrimonio deportivo, sino tambe komo un parti integral di e memoria kolektivo i patrimonio kultural di Kòrsou.
Konsiderando tur esakinan, hasiendo uso di artíkulo 96 di Reglamentu di Òrdu di Parlamento, suskrito ta hasi e siguiente preguntanan:
1. Minister ta di opinion ku e klasifikashon i partisipashon di Kòrsou na Mundial FIFA 2026, huntu ku e desaroyo di Blue Wave, ta forma un legado nashonal di gran balor históriko, deportivo, kultural, edukashonal i sosial? Si ta asina, ta eksistí un vishon òf maneho pa garantisá e preservashon, dokumentashon i promoshon di e legado aki?
2. Kon minister ta mira e proposishon pa realisá un dokumentario profeshonal ku ta dokumentá henter e trayekto di Kòrsou rumbo pa Mundial FIFA 2026, inkluyendo e desaroyo i e signifikado sosial di e fenómeno nashonal Blue Wave? Minister ta dispuesto pa evaluá e posibilidat di brindá sosten òf fasilitá e realisashon di un proyekto di e naturalesa aki?
3. Kon minister ta mira e ròl ku Museo di Kòrsou i Archivo Nashonal Kòrsou por desempeñá den e proseso di identifikashon, dokumentashon, kolekshon, konservashon i preservashon di e material históriko relashoná ku e trayekto di Mundial FIFA 2026 i Blue Wave? Ademas, kua otro instansianan òf stakeholdernan minister ta konsiderá relevante pa kontribuí na e realisashon di e dokumentario i na e preservashon di e legado nashonal aki?
4. Minister ta dispuesto pa promové un aserkamentu multidisiplinario den e realisashon di e dokumentario, dor di involukrá profeshonalnan lokal i internashonal ku eksperensia den dokumentarionan, investigashon históriko, patrimonio kultural i produkshon oudiovisual, ku fin di garantisá un produkto di kalidat haltu i balor duradero?
5. Minister ta dispuesto pa eksplorá, huntu ku e Ministerio di Enseñansa, Siensia, Kultura i Deporte i otro instansianan relevante, e posibilidat pa pone e dokumentario disponibel i rekomendá komo un rekurso edukashonal den nos skolnan, komo instrumento pa fortalesé konosementu históriko, identidat nashonal i desaroyo di balornan entre hóbennan?
6. Minister ta dispuesto pa fasilitá un aliansa stratégiko ku Curaçao International Film Festival (CIFF) i otro institushonnan kultural i oudiovisual relevante, ku meta pa hasi uso di nan eksperensia, kompetensia i konekshonnan internashonal pa fortalesé e kalidat, visibilidat i impakto internashonal di e dokumentario, inkluyendo un estreno ofisial durante CIFF?
7. Si un pueblo no dokumentá su gran momentonan, e ta kore e riesgo di pèrdè un parti di su memoria kolektivo. Den e kuadro aki, kon minister ta mira e responsabilidat di Parlamento pa kontribuí na e preservashon i transmishon di e legado di Mundial FIFA 2026 i Blue Wave? Kua papel konkreto Parlamento por desempeñá pa hasi e dokumentario proponé posibel?
Suskrito ta apresiá si minister por duna kontesta riba e preguntanan hasi por eskrito.
Atentamente,
Ishahier Monte,
Parlamentario pa
frakshon di MFK
