Eksperto di IAEA ta bishitá Ministerio di Salubridat, Medio Ambiente i Naturalesa

Eksperto di IAEA ta bishitá Ministerio di Salubridat, Medio Ambiente i Naturalesa

Den siman di 27 di yüli 2026, Ministerio di Salubridat, Medio Ambiente i Naturalesa (GMN) a risibí bishita di un eksperto di International Atomic Energy Agency (IAEA). E propósito di e bishita aki tabata pa duna informashon tékniko i hasi un inventarisashon aki na Kòrsou di tur fuente i ekipo ku ta emití radiashon.

Den kolaborashon ku Inspekshon Protekshon di Salú i Departamentu di Maneho di Medio Ambiente i Naturalesa, a bishitá diferente instansia na Kòrsou pa identifiká i dokumentá ekiponan i fuentenan di radiashon ku ta den uzo. Ademas, a duna personal di GMN instrukshon práktiko tokante uzo korekto di aparatonan pa detektá radiashon ionisante, meskos tambe tokante registrashon di ekipo i fuente di radiashon.

E bishita aki ta forma parti di un trayekto mas amplio pa den konkordansia ku debernan internashonal, desaroyá lei (Konsepto di Ordenansa Nashonal pa Implementashon di Tratadonan relashoná ku Garantia Nuklear) pa  Kòrsou.

Den e kuadro aki, Departamentu di Maneho di GMN ta trahando riba desaroyo di legislashon, manera e konsepto di Ordenansa Nashonal pa Implementashon di Tratadonan relashoná ku Garantia Nuklear, ku lo krea e base legal nesesario pa implementá tratadonan internashonal relashoná ku garantia nuklear.

Ministerio di GMN ta balorá e kolaborashon ku IAEA i tur instansia lokal ku a
kontribuí na e bishita. Inisiativanan manera esaki ta yuda fortifiká kapasidat di Kòrsou den protekshon di nos salú públiko, medio ambiente i seguridat, i ta prepará e pais pa kumpli ku e standardnan internashonal den e área di radiashon i teknologia nuklear.