Fundashon Museo Tula ta lansa “Vlam di Libertat 2026” ku un seri di aktividat edukativo i kultural
Fundashon Museo Tula ta lansa “Vlam di Libertat 2026” ku un seri di aktividat edukativo i kultural
WILLEMSTAD –Fundashon Museo Tula huntu ku Fundashon Kiminá ta organisá Vlam di Libertat 2026, un seri di tres aktividatnan ku tin komo meta pa konmemorá e lucha pa libertat di 1795 bou di liderato di Tula, miéntras ku ta kreá espasio pa edukashon, dialogo i reflekshon riba nos historia i identidat. E aña aki ta pone enfasis tambe na e muhénan ku tambe a hiba lucha den e periodo ei.
E programa ta konsistí di tres aktividatnan úniko, kada un ku su propio karakter i mensahe, pero tur tres ta konektá pa e tema sentral di libertat, resistensia i komunidat.
E seri ta kuminsá riba djadumingu 9 di ougùstùs ku Ubuntu. Un dia habrí na Landhuis Kenepa for di 10or di mainta te 4or di atardi. Inspirá pa e filosofia Afrikano di Ubuntu – “Mi ta pasobra nos ta”, e aktividat lo ofresé un programa variá ku workshòp interaktivo, baile, demostrashonnan
di arte, preparashon di artefaktonan di protekshon tradishonal i diferente aktividatnan edukativo pa tur ku ta presente. Meta di e dia ta pa pone bishitantenan den kontakto ku e historia, kultura i balornan ku ta uní nos komo pueblo.
Dia 13 di ougùstùs, e programa ta sigui ku Uhuru, un seminario ku lo tuma lugá na Landhuis Bloemhof for di 7or di anochi te 9or di anochi. Uhuru, e palabra na Suahili pa “libertat”, ta sirbi komo punto di partida pa un anochi di informashon tokante afro-spiritualidat i e papel ku fe, kultura i resistensia a hunga den e lucha di nos antepasadonan. E seminario ta bou di guia di Mara Letí i Bob Harms. Partisipashon ta posibel solamente ku reservashon adelantá.
E kulminashon di e programa lo tuma lugá riba djasabra 15 di ougùstùs ku Vlam di Libertat, un seremonia musikal i spiritual na Landhuis Kenepa for di 10or di anochi te 1or di mardugá. E anochi ta kuminsá ku un kaminata simbóliko ku ta kulminá nan pa e punto sentral kaminda lo sende e Vlam di Libertat. E seremonia ta simbolisá e legado ku Tula i tur esnan ku a lucha pa libertat a laga atras, i ta invitá komunidat pa sigui mantené e vlam di memoria, hustisia i dignidat sendé.
Pa fasilitá partisipashon na e seremonia, transpòrt lo sali for di SVB Otrobanda 8or di anochi en punto. Lugánan ta limitá i mester reservá adelantá.
Fundashon Museo Tula ta spera ku Vlam di Libertat 2026 lo stimulá dialogo entre generashonnan, profundisá e konosementu tokante nos pasado i inspirá komunidat pa sigui balorá libertat komo un responsabilidat komun.
Pa reservashon pa Uhuru i Vlam di Libertat, por bishitá http://www.fundashonmuseotula.com òf mail na info@fundashonmuseotula.com.
