“Heart of Worship 2026” ta trese adoradó internashonal Michael Bethany pa Korsou

“Heart of Worship 2026” ta trese adoradó internashonal Michael Bethany pa Korsou
Willemstad, Kòrsou – Faltando ménos ku dos siman, Life Changers Foundation ta hopi kontentu pa anunsiá e benida di adoradó i oradó internashonal Michael Bethany na Korsou. Tur preparashon ta bai segun planifikashon, i e komunikashon ku Michael Bethany i su ekipo ta kana ekselente.
Segun Pastor Widney Martha, organisadó di e evento, Michael Bethany mes a ekspresá hopi entusiasmo riba su platfòrmanan di social media pa bishitá Korsou pa promé biaha.
Michael Bethany ta un artista kristian, oradó internashonal i mentor di adorashon ku a gana varios premio. Riba nivel mundial e ta konosí pa su trabou ku pastornan, lidernan di adorashon, músikonan i kreativonan. Su pashon ta pa fortalesé ministerionan di adorashon, desaroyá departamentonan efektivo di adorashon i guiá iglesianan den eksperensianan profundo ku ta trese transformashon.
Su último álbum, “Overflow”, lansa den kolaborashon ku Capitol Rethink, a risibí dos nominashon pa GMA Dove Awards. Ademas, su ministerio online a supera mas di 20 mion visualisashon riba YouTube i e a wòrdu presentá den medionan prominente manera Daystar Television Network i CCM Magazine.
Pastor Martha ta rekonosé ku pa algun hende e nomber “Michael Bethany” por no parse familiar. “Pero hopi biaha ora hende wak òf tende su kantikanan riba YouTube, nan mes ta bisa: ‘Ah, sigur mi konosé e kantikanan ei!’,” I esaki ta algu speshal ku Korsou por risibí un adoradó di e kalidat aki, i esaki tambe ku entrada kompletamente grátis. “Aunke bo no konosé Michael personalmente, sigur tin varios di su kantikanan ku bo a tende promé. Nos ta spera ku tur hende por uni den alabansa i adorashon e anochi ei.”
Ademas di Michael Bethany, e programa lo konta ku partisipashon di LC Worship, huntu ku Laura Martha, Pastor Widney Martha i varios otro adoradónan lokal. E anochi aki mester sirbi pa ta un eksperensia di adorashon pa henter e komunidat.
Worship Workshop
Den kuadro di e bishita aki, riba 21 di ougùstùs lo tin un Worship Workshop, destiná pa adoradónan, músikonan, lidernan di ministerio i tur persona ku tin deseo di krese den adorashon. E workshop lo ofresé enseñansa práktiko, inspirashon i hermentnan balioso pa fortalesé ministerionan di adorashon.
Pa partisipá na e workshop, ta nesesario pa registrá adelantá na http://www.lifechangers-ministries.org .
Heart of Worship – Worship Night
Riba 22 di ougùstùs, komunidat henter ta kordialmente invitá pa asistí na Heart of Worship, un anochi speshal di alabansa i adorashon.
Entrada ta totalmente grátis. Aporte boluntario lo ta bon biní pa yuda kubri gastunan di e inisiativa. Pa e Worship Night no ta nesesario pa registrá.
Tur aktividatnan lo tuma lugá na LCDC Center, Weto 95, i lo kuminsá 7:30 di anochi.
Life Changers Foundation ta hasi un yamamentu na tur persona, sin konsiderá denominashon, pa bini eksperensiá un anochi den presensia di Dios.
“Bini unu bini tur ban uni den adorashon i laga presensia di Dios toka i transforma nos bida,”
Pa mas informashon òf pa bira partner di e evento, por yama òf manda WhatsApp na 670 9626, òf manda un e-mail na lifechangerscuracao@gmail.com.