WSCC ta tene seshon informativo ku tema Kuida bo mente awe, pa disfrutá mañan  Ku enfoke riba e malesa Alzheimer

Willemstad: 9 di Ougùstùs 

WSCC ta tene seshon informativo ku tema Kuida bo mente awe, pa disfrutá mañan 

Ku enfoke riba e malesa Alzheimer

WILLEMSTAD – WoMen’s Steering Committee Curaçao (WSCC), djasabra mainta 8 di Ougùstùs, a kontinuá ku su seri di seshonnan informativo na su ofisina na Sta. Rosaweg 104C.

Bou di e tema: Kousa -i faktornan di riesgo di Alzheimer, a kompartí informashon tokante di e malesa. E organisashon, pa e okashon aki, a enfoká riba e importansia di prevenshon i kon hiba un estilo di bida salú pa mantené nos mente fuerte.

Na apertura di e seshon, Presidente di WSCC, sra. Mirieta Lourens-de Lanoy, a bisa; “Un di e propósitonan di WSCC ta pa, riba un base kontinuo, informá, eduká i empoderá, nos komunidat. Alzheimer no ta un tema leu for di nos. E no ta un malesa ku manera hopi ta pensa ta mará na edat. E por afektá nos tur. Tur dia tin pashènt i miembronan di nan famia ku mester lucha kuné. P’esei ta importante ta informá tokante di e malesa. Kon por detektá señalnan, kiko hasi ora tuma nota di e señalnan, etc. Informashon ta e hèrmènt pa nos ta bon prepará i alabes esaki por duna speransa.” 

E seshon informativo a konta ku presensia di sra. Chanerika Hellement, Presidente di Stichting Alzheimer, ku tabata e oradó invitá. Sra. Hellement a elaborá riba kousanan i faktornan di riesgo di Alzheimer. Alabes e la duna informashon di e diferente tipo di e malesa, nan origen, e señalnan ku mester tene kuenta kuné, kiko mester of por hasi pa evitá i tambe a duna rekomendashonnan kon pa hiba un estilo di bida pa nos protehá nos selebre i pa esaki ta salú.

Partisipantenan a haña oportunidat pa hasi pregunta i a sali ku mas konosementu kon nan por protehá nan salú mental i tambe di esnan rondo di nan. “Importante ta pa nos kuida awe pa mañan nos no ta un karga pa nos famia. E enfermedat aki no ta mará na edat. Pues nos tur mester ta bon informá,” sra. Lourens -de Lanoy a klousurá bisando.

WSCC ta gradisí tur partisipante i tambe Stichting Alzheimer i prensa pa nan kolaborashon. E organisashon lo sigui organisá seshonnan informativo pa empoderá miembronan di organisashonnan afiliá na WSCC en particular, nos komunidat en general i ta rekomendá pa sigui informashon via di medionan di komunikashon.

Pa mas informashon: info@steeringcommitteecuracao.org 

WhatsApp: + 5999 5267234 /+599 9 510 8159 / +599 9 512 8467