Gobièrnu di Kòrsou hasiendo lo nesesario pa nos suidadanonan na Colombia

Willemstad – djamars 11 di ougùstùs 2026, Despues di e temblor ku a afektá parti di Colombia djaluna 10 di ougùstùs 2026, Gobièrnu di Kòrsou a tuma e akshonnan nesesario pa asistí nos suidadanonan ku a keda afektá i pa, si ta nesesario, organisá un buelo di repatriahe pa esnan ku mester regresá Kòrsou.

Awe merdia, Promé Minister Gilmar Pisas a risibí e notisia tristu ku e temblor a kosta bida di un habitante di Kòrsou. Tambe tin tres yu di Kòrsou ku a resultá heridá. Respetando e momento sumamente delikado aki, Gobièrnu a warda pa, den konsulta ku famia, por komuniká e informashon tokante e víktimanan ku komunidat.

Gobièrnu a tuma akshon mesora pa kuminsá ku e trámitenan nesesario pa asistí e famia. A duna direktor di Direktorado di Maneho di Riesgo enkargo pa koordiná e akshonnan i a tuma kontakto ku Embahada di Reino na Bogotá. E representante di famia di e víktima a ser poné den kontakto ku e kolaboradó konsular di Embahada, pa nan por risibí e asistensia nesesario den e momento difísil aki. Gobièrnu di Kòrsou ta wardando riba outorisashon di Gobièrnu di Colombia pa, den konsulta i estrecho koordinashon ku famia, por sigui ku e trámitenan nesesario pa trese e persona ku a fayesé bèk Kòrsou.

E preparashonnan pa un eventual buelo di repatriahe ta keda stand-by, ya ku Embahada di Reino ainda no a identifiká otro siudadanonan di Kòrsou ku tin nesesidat di ser repatriá.

Gobièrnu di Kòrsou ta sigui urgi tur siudadano ku ta biaha pa eksterior pa registrá nan estadia serka Embahada di Reino. Esaki ta yuda e outoridatnan tin un mihó bista na unda nos siudadanonan ta, i fasilitá asistensia den kaso di un desastre òf otro situashon di emergensia.

Gobièrnu di Kòrsou ta ekspresá su mas profundo palabra di kondolensia na famia i sernan kerí di e víktima ku a fayesé. Na e tres personanan ku a resultá heridá, Gobièrnu ta deseá nan un pronto i kompleto rekuperashon.