Minister Charetti America-Francisca a lansa ku ‘Bario ta Famia’ ku sosten pa mucha

WILLEMSTAD – Minister di Desaroyo Sosial i Bienestar (SOAW), Charetti America-Francisca, a bishita diferente Sentro di Bario den e último dianan ku a pasa. A bai Sentro di Bario Soto, Tera Kòrá, Brievengat pa duna sosten na nos muchanan na inisio di un aña eskolar nobo. E bishitanan aki na mesun momentu a duna inisio na e proyekto ‘Bario ta Famia’. Un inisiativa kaminda Minister ke purba trese SOAW mas serka di famia i bario.

Durante e bishitanan aki e mucha entre 8 pa 12 aña di famianan ménos pudiente tabata pará sentral. Nan a risibí un tas di skol i un buki di pinta ku ta hiba e titulo “E kaminda ta largu, pero bo ta yega si!’. Ta un buki ku minister Charetti America-Francisca mes a desaroyá. Banda di esaki tabatin espasio pa aktividat i atenshon personal i kòmbersashon ku e mucha i nan mayor.

E buki ta stimulá e mucha pa pensa riba su soño, talento, meta i retonan. E mensahe sentral ta ku e sirkunstansia den kua e mucha ta aworaki no mester definí su futuro.

“E kaminda por ta largu, difisil i no tur kos ta logra mesora. Pero mi ke motivá nos muchanan pa keda kere den nan mes, kuminsá di nobo si mester i stap pa stap nan lo yega leu. Nan situashon aktual no nesesariamente ta nan futuro.”

Enbolbimentu personal ta haña un nifikashon mas amplio
Pa minister Charetti America-Francisca e aktividatnan tin un karakter personal. Defakto, promé ku su tempu komo minister, ela tuma e inisiativa personal pa sostené muchanan di kasnan ménos pudiente den periodo ku skol ta bai kuminsá.

“Esaki no ta algu ku mi a kuminsá hasi solamente despues di a bira minister; mi tabata hasié kaba promé ku e tempu ei, impulsá pa mi kompromiso personal ku mucha i famianan. Awor, den mi kalidat komo minister, mi ke konektá e mesun kompromiso ei na algu mas grandi: ta mas serka di hende, skucha e asuntunan ku ta hunga ròl, i kaminda ta nesesario, fasilitá e konekshonnan korekto.”

E minister ta enfatisá ku partimento di tas di skol no ta solushona e situashon di pobresa. E aktividat aki ta representá un kontribushon tangibel na un reto sosial muchu mas grandi i ta komplementá e sosten ku SOAW ta duna na famianan ku no tin e medionan finansiero nesesario pa artíkulonan manera unifòrm di skol i otro kosnan esensial pa nan yunan.

Bario ta Famia: mas serka di e bario
E idea tras di ‘Bario ta Famia’ ta ku un bario ta mas ku djis un akomulashon di kas. Famianan ta forma bario, barionan ta forma komunidat i e komunidatnan ei ta konstruí Kòrsou. Pues fortifiká famianan ta kontribuí na barionan mas fuerte i un Kòrsou mas fuerte.

Ku ‘Bario ta Famia’, e minister tin komo meta pa bishitá barionan mas frekuente, no solamente pa entregá algu, pero mas ku tur kos pa skucha, pone atenshon riba asuntunan den un fase trempan, trese informashon mas serka di residentenan i kaminda ta nesesario konektá hende ku e sosten i servisionan ku SOAW ta proveé.

Sentronan di bario por hunga un ròl importante den esaki. Komo nan ta situá mei mei di e komunidat, nan por yuda hasi e “gap” entre e habitantenan i servisio sosial mas chikí.

“Maneho sosial efektivo no ta wòrdu kreá solamente for di tras di un büro. Nos mester komprondé kiko realmente ta importante pa nos yu, mayor i famianan. Ta p’esei nos ke ta presente i aksesibel den e barionan. No solamente pa duna sosten, pero tambe pa skucha i traha huntu pa identifiká kiko ta e nesesidatnan.”

Ku e aktividatnan rondó di inisio di aña eskolar ta lansa e proyekto: ‘Bario ta Famia’. Den e próksimo periodo, Minister America-Francisca tin plania pa sigui bishitá diferente bario, enfoká riba diferente grupo i asuntunan sosial dependiendo di e nesesidat i preokupashonnan spesífiko di kada bario.

‘Bario ta Famia’. E Minister, mas serka di bo. Mas serka di bo famia. Mas serka di bo bario.

MAS NOTISIA

Ministerio konserní:Desaroyo Sosial, Labor i Bienestar