CBCS i UoC ta lansa inisiativa pa kátedra di bienestar finansiero  

 

CBCS i UoC ta lansa inisiativa pa kátedra di bienestar finansiero  

PHILIPSBURG/WILLEMSTAD — Centrale Bank van Curaçao en Sint Maarten (CBCS) a lansa un  inisiativa pa krea un kátedra ekstraordinario di Bienestar Finansiero na University of Curaçao  dr. Moises da Costa Gomez (UoC). Atraves di e kolaborashon nobo akí, CBCS i UoC ta traha  pa redusí e distansia entre investigashon akadémiko i práktika, spesífikamente riba tereno di  komportashon finansiero, resiliensia finansiero, bienestar finansiero i stabilidat di sektor  finansiero. 

E kátedra lo konsentrá prinsipalmente riba e konekshon ku ta eksistí entre bienestar finansiero na  nivel individual (esta, konosementu i abilidat finansiero, komportashon finansiero i resiliensia), i na  nivel di sektor finansiero (por ehèmpel, pa loke ta trata instituto finansiero, supervishon i regulashon, i stabilidat finansiero). E pregunta sentral ta: Kon por fomentá bienestar finansiero na  ámbos nivel? Presidente saliente di CBCS, Richard Doornbosch, ta splika: ‘Stabilidat finansiero di  un pais tin hopi di aber ku komportashon di su siudadano- i organisashonnan individual, esta, kon  nan ta atendé ku plaka, i ku e manera ku sektor finansiero ta reakshoná na tal komportashon. Ora  e interakshon ei ta sano, esei ta kontribuí na bienestar finansiero, tantu di e individuo komo di  henter komunidat.’ 

E kátedra ekstraordinario na UoC ta den proseso di formalisashon. E promé dos añanan, un  profesor internashonal ku eksperensia i ekspertisio amplio den e áreanan akí lo desempeñá e  posishon. Durante e periodo ei, un máksimo di tres kandidato doktorá di Kòrsou i Sint Maarten lo  tin e oportunidat di sigui desaroyá nan mes bou di guia di e katedrátiko. Na fin di e periodo di dos 

aña, e lo emití un rekomendashon tokante ken lo por kontinuá ku e kátedra i UoC lo sigui e proseso  normal pa nombramentu di profesor. E aserkamentu akí ta hiba na un invershon stratégiko den  desaroyo di talento akadémiko lokal i na mes momento ta garantisá ku e kátedra lo tin un presensia  di largu plaso den nos region. 

E kátedra lo opera den un siklo kontinuo di investigashon, maneho i práktika. Ademas, e tres  aspektonan akí lo reforsá otro mutuamente. Investigashon lo genera konosementu i dato nobo i, semper ku ta posibel, lo hasi esakinan disponibel via UoC su Sentro di Investigashon, pa kontribuí  na desaroyo i ahuste di maneho. Enseñansa, programa di formashon i un Koalishon Nashonal pa  Bienestar Finansiero lo pèrkurá pa e kátedra keda bon konektá ku práktika diario. 

Entidat públiko i privá, instituto finansiero, organisashon di sosiedat sivil i instituto di enseñansa lo  traha huntu den e Koalishon pa evaluá relevansia, faktibilidat i impakto sosial di resultado di e investigashonnan. Na su turno, eksperensia di práktika diario por hiba na mas investigashon. Asina,  CBCS su deseo pa su investigashonnan tin mas impakto sosial i UoC su vishon pa kontribuí na un desaroyo balansá pa Kòrsou ta bini huntu den un solo modelo sostenibel.

Inisialmente, e aktividatnan lo ta enfoká riba Kòrsou i Sint Maarten. Pero despues, por inkluí tambe  Aruba, Boneiru, Sint Eustatius i Saba. Den futuro, suseshon di e kátedra tambe lo tin un karakter  regional: despues di e periodo inisial di sinku aña, por nombra un katedrátiko nobo di un di e otro  islanan ku ta partisipá. Asina, e kátedra lo desaroyá i bira un punto di referensia lokal, pero tambe 

un plataforma regional di konosementu pa henter e parti karibense di Reino Hulandes. 

Willemstad, 31 di ougùstùs 2026 

CENTRALE BANK VAN CURAÇAO EN SINT MAARTEN