Kurso Transporte Públiko finalisá ku éksito

 

 

 

WILLEMSTAD – Kòrsou tin un grupo nobo di suidadanonan ekipá pa traha den transporte públiko! Na ougùstùs 2026 dos grupo a finalisá e kurso “Rijdend met Kompas”.

Esaki ta un programa di formashon profeshonal destiná pa potensial shofùr di taksi i/òf bùs.

Partisipantenan a risibí training pa ehekushon profeshonal di nan funshon. Esaki a inkluí:
– leinan di transporte públiko,
– servisio na kliente,
– komunikashon den diferente
– ⁠idioma
– ⁠turismo,
– ⁠negoshashon, i
– ⁠étiketa profeshonal.

A atendé tambe ku otro kompetensia importante pa por ofresé un servisio sigur, konfiabel i di kalidat.

Sin finalisá e kurso aki, no ta posibel pa traha den e sektor.

E aña aki a lansá tambe un proyekto piloto di training den promé ousilio (EHBO) pa tur partisipantenan. Nan a siña kon pa trata ku sofokamentu, sangramentu grandi, pèrdida di konosementu, i paro kardíatiko.

Meta tabata pa e shofùr, ku ta den kontakto ku pasahero diaramente, manera suidadank i bishitante, por ta e promé persona presente den kaso di un emergensia.

VVRP felisitá tur graduado ku a kompletá e programa ku èksito. Tambe ta yama danki na tur partner ku a kontribuí na realisashon di e programa.

‘Rijdend met Kompas’ ta un inisiativa di Ministerio di Tráfiko, Transporte i Planifikashon Urbano (VVRP) den kolaborashon ku Ministerio di Enseñansa, Siensia, Kultura i Deporte (OWCS), Curaçao Tourist Board (CTB), i Nostra Growth.

OWCS tin un ròl esensial den garantisá e kalidat di e programa. E sertifikadonan ta rekonosé i akreditá konforme e normanan edukativo vigente.

Tambe Curaçao Tourist Board (CTB) a i ta sigui kontribuí na e profeshonalisashon di sektor di transporte públiko riba kontenido di e programa i finansiamentu.