Delegashon di Parlamento di Kòrsou a partisipá na reunion di Komishon Speshal pa Karibe di Parlatino na Santo Domingo, República Dominicana.  

Delegashon di Parlamento di Kòrsou a partisipá na reunion di Komishon Speshal pa Karibe di Parlatino na Santo Domingo, República Dominicana.  

 

SANTO DOMINGO, República Dominicana  E Komishon Speshal pa Karibe di Parlatino, ku a keda instalá na Kòrsou na mei 2026, a reuni di 10 te 12 di sèptèmber 2026 na Santo Domingo, República Dominicana. Durante e reunionnan a deliberá riba diferente temanan di importansia pa e region di Karibe, ku enfoke prinsipalmente riba medio ambiente i seguridat di alimentashon.

 

E reunion a kuminsá ku e parti ofisial, ku diskursonan di entre otro sr. Rolando González Patricio, Presidente di Parlatino, i sr. Alfredo Pacheco Osoria, Presidente di Cámara di Diputados di República Dominicana. Despues di e parti ofisial, e komishon a sigui ku su agènda di trabou.

 

Un di e temanan ku a hala hopi atenshon tabata e fenómeno di Sargassum, ku ta afektá henter e region di Karibe i ku a kibra tur rèkort den 2026. E komishon a deliberá riba e impakto di e fenómeno i e nesesidat pa sigui buska solushonnan pa e desafionan ku e region ta enfrentá.

 

Komo invitado speshal, Minister di Desaroyo Ekonómiko i Turismo di Kòrsou, sr. Roderick Middelhof, a duna un presentashon riba e plannan i maneho di Gobièrnu di Kòrsou pa atende ku e tema di seguridat di alimentashon.

 

Durante e último dia di reunion, e komishon a klousurá su trabou ku un presentashon di un eksperto riba derecho ambiental internashonal. Durante e presentashon i debate, a hala atenshon riba e echo ku, apesar ku Aruba, Kòrsou i Sint Maarten tin outonomia, den e maneho di kambio klimatológiko tin sierto aspektonan kaminda konsultashon òf intervenshon di Reino Hulandes ta inevitabel.

Entre e aspektonan menshoná tabata:

• Finansiamentu: e nesesidat pa tene kuenta ku e kondishonnan ora ta hasi uso di fondonan kaminda Reino Hulandes ta ehersé supervishon finansiero.
• Asuntunan institushonal: e repartishon di responsabilidatnan entre e paisnan i Reino Hulandes, konforme e Statüt di Reino.
• Konkordansia entre sistema legal: e obligashon pa e paisnan tin sierto grado di konkordansia den nan leinan, konforme e Statüt di Reino.

 

E eksperto tambe a menshoná IPKO komo un plataforma útil pa konsultashon entre Aruba, Kòrsou, Sint Maarten i Hulanda tokante medidanan di karakter general.

 

E último deliberashon di e komishon a enfoká riba aspektonan tékniko relashoná ku e aplikashon i adaptashon di leinan Modelo di Parlatino den e sistemanan legal/hurídiko di Aruba, Kòrsou i Sint Maarten.

 

Na final di e reunionnan, e Presidente di e Komishon Speshal pa Karibe, e Presidente di Parlatino i e Presidente di Cámara di Diputados di República Dominicana a tene un rueda di prensa. Komo anfitrion, e Cámara di Diputados a finalisá e programa ku un rekorido pa e miembronan di e komishon den e kongreso.

 

E delegashon di Kòrsou tabata konsistí di Presidente di Parlamento, sr. Fergino Brownbill, miembronan di Parlamento sr. Ramón Yung, sr. Ruisandro Cijntje i sr. Juniël Carolina, i Grefir di Parlamento, sr. Silvin Cijntje.