Alerta públiko: Tene kuidou ku plataformanan ku ta primintí plaka fásil

WILLEMSTAD – Gobièrnu di Kòrsou ta hasi un yamada urgente na komunidat pa ta sumamente kouteloso ku plataformanan i sistemanan ‘online’ ku ta primintí ganashi rápido a kambio di tareanan simpel manera wak kontenido, pone “like”, sigui kuentanan, kompartí publikashon òf invitá otro hende pa djòin e sistema.

Últimamente tin atenshon pa sistemanan ku ta funshoná bou di diferente nòmber. Sin adelantá riba konklushonnan tokante un plataforma spesífiko, Gobièrnu ta atvertí ku mester trata ku máksimo koutela, sistemanan kaminda hende mester paga òf depositá nan mes plaka pa despues supuestamente gana mas plaka.

Outoridatnan internashonal di protekshon di konsumidó, entre nan ‘Federal Trade Commission (FTC)’ na Merka, ta atvertí pa e fenómeno akí konosí  komo “task scam” òf froude di tarea. Den e tipo di sistema akí, un persona por haña tareanan simpel manera: mira un ‘komishon’ òf ‘suma’ di plaka subi riba un plataforma i asta haña un pago chikí na kuminsamentu. Despues, ta pidi e persona pa depositá su propio plaka pa habri mas tarea, subi di nivel òf lanta e supuesto ganashi. FTC ta atvertí ku e sifranan ku ta paresé den e plataforma por ta simplemente un ilushon i ku despues di hasi depósito e persona por pèrdè su plaka i bira víktima di e sistema.

P’e motibu akí gobièrnu ta hasi un súplika na pueblo pa no riska bo plaka.

Promé ku bo drenta den kualke sistema asina, puntra bo mes:

1. Kiko realmente e negoshi ta? Unda e entrada real di e kompania ta bini for di dje?
2. Dikon mi mester paga promé pa mi por gana plaka?
3. E ganashi ta bini for di aktividat ekonómiko real, òf for di plaka di miembronan nobo?
4. E kompania ta registrá legalmente, i den kua pais?
5. E kompania tin pèrmit òf lisensia nesesario pa operá na Kòrsou?
6. Ken ta e doñonan, direktor i personanan responsabel?
7. Tin informe finansiero kontrolá òf ouditá pa un instansia independiente?
8. Ken ta supervisá e aktividatnan di e plataforma?
9. Bo por saka tur bo plaka inmediatamente, sin mester paga un depósito, impuesto òf gastu èkstra?
10. Kiko ta pasa ku bo plaka si mañan e plataforma stòp di operá?

Si no tin kontesta kla, dokumentá i kontrolabel riba e preguntanan aki, no pone bo plaka na riesgo.

“Mi a haña plaka kaba” no ta prueba ku e sistema ta sigur.
Esaki ta sumamente importante. E echo ku un persona a risibí un pago no ta garantisá ku un sistema ta legal, sigur òf sostenibel. Segun FTC, den ‘task scams’ ta algun partisipante ta risibí pago chikí na kuminsamentu, presisamente loke por laga nan konfia mas den e plataforma i despues depositá sumanan mas grandi. Tambe testimonio di un amigu, famia òf konosí ku ta bisa “ami a gana plaka” no ta remplasá prueba di registro, lisensia, kontròl finansiero ni tampoko un modelo di negoshi sostenibel. FBI tambe ta atvertí ku den skemanan froudulento un persona ku ta rekomendá e sistema mes por ta un víktima ku ainda no ta konsiente di esaki.

“Paga pa bo por haña” ta un bandera kòrá grandi.
Un prinsipio simpel ku por protehá bo ta ku, si bo mester paga plaka pa por risibí e plaka ku e sistema ta bisa ku bo a gana, para ketu i investigá promé. FTC ta indiká esaki komo un señal importante di ‘task scam’. E organisashon ta rekomendá pa hende no paga pa por haña pago i pa ta kouteloso ku ofertanan inesperá di trabou via WhatsApp, Telegram òf otro medionan sosial.

No laga ganashi rápido tapa bo huiso.
Froude moderno no semper ta parse froude. Aunke ku e por tin ‘website’ bunita, un aplikashon ku ta parse profeshonal, ‘dashboard’ ku ta mustrá bo “ganashi”, gruponan di Whatsapp òf Telegram yená ku personanan ku ta konta di nan “éksito” i asta ta duná un pago na kuminsamentu. Esaki no ta prueba di legitimidat ni maske kon profeshonal e ta mustra. FTC a dokumentá ku den ‘task scams’ e plataforma mes por ta diseñá pa krea e ilushon di ta akumulando ganashi.

E mensahe di parti di Gobièrnu ta kla.
No depositá plaka solamente pasobra nan ta primintí bo mas plaka.
No bai fia sèn pa drenta den un sistema asina.
No konvensé famia i amigu pa drenta solamente pasobra abo a risibí un pago.
No laga preshon di grupo, testimonio riba medionan sosial òf miedu di pèrdè “e oportunidat” poné bo tuma un desishon finansiero sin investigá.
Si un plataforma ta obligá bo paga un suma nobo pa saka e plaka ku supuestamente ta di bo: no sigui paga.

Protehá bo propio plaka. Protehá bo famia. I pensa bon promé ku bo entregá bo datonan personal òf finansiero na un plataforma ‘online’ pa despues bo mester lamentá. Ganashi ku ta parse muchu fásil pa ta bèrdat meresé investigashon i koutela èkstra.

Gobiernu di Kòrsou ta hasi un yamada na tur siudadano pa investigá promé, pidi pruebanan, no kai pa preshon i no manda plaka si bo no ta sigur. No laga promesa di plaka fásil kita, e loke ku bo a traha duru p’e for di bo.