Ministerio di Finansa ta lansa Mini Mòni: un guia aksesibel riba Presupuesto di Pais

Willemstad – Ministerio di Finansa ta presentá e edishon piloto di Mini Mòni, un guia kòrtiku i aksesibel, desaroyá pa hasi informashon di presupuesto mas fásil pa komprondé tantu pa siudadanonan komo pa funshonarionan públiko. Den un idioma kla i komprendibel, e guia ta splika kon e Presupuesto di Pais Kòrsou ta formá, di unda entrada di Gobièrnu ta bin, kon e fondo públiko ta keda distribuí i kon e presupuesto tin influensia riba bida diario di habitantenan di Kòrsou. E guia ta disponibel na Papiamentu i Hulandes i lo ser publiká anualmente.

Awor ku Presupuesto 2027 a ser entregá na Parlamento, Ministerio di Finansa ta publiká e edishon piloto di Mini Mòni, basá riba informashon di presupuesto di 2026. Asina, usuarionan por haña un bista kla di loke nan por spera ora ku Parlamento aprobá Presupuesto 2027.

Pa hopi hende, e presupuesto ta un dokumento kompliká, yen di sifra, tabèl i término finansiero. Mini Mòni ta tradusí e informashon akí na un manera kla i fásil pa komprondé. Asina, e lesadó por haña un mihó komprondementu di entrada i gastunan di Gobièrnu, i e eskohonan ku ta ser tumá den áreanan manera enseñansa, salubridat, infrastruktura, seguridat i desaroyo ekonómiko.

E guia a keda desaroyá ku e meta pa hasi informashon finansiero aksesibel pa un públiko amplio. No ta nesesario pa un persona tin konosementu finansiero pa komprondé su kontenido. Ku lansamentu di Mini Mòni, Ministerio di Finansa ta enfatisá e balor di transparensia, komprondementu finansiero di nos Pais i partisipashon aktivo di komunidat. Un komunidat bon informá por kontribuí mihó na e diskushon tokante e eskohonan ku ta determiná futuro di Kòrsou.

Mini Mòni 2026 ta disponibel pa ‘download’ aki.