“Huntu nos a dal e promé paso”: ACU ta invertí den e futuro di nos hubentut
“Huntu nos a dal e promé paso”: ACU ta invertí den e futuro di nos hubentut
Willemstad, 18 di sèptèmber 2026 — Djabièrnè último, ACU a rekonosé e promé embahadornan di su Programa Hóben Embahador. E programa a kuminsá na 2025 ku e meta pa krea mas konsientisashon serka di e hóbennan di Kòrsou tokante e balor di kolaborashon i e prinsipionan ku ta forma e base di un kooperativa.
Loke a kuminsá komo un idea a bira un trayekto balioso ku a trese e komunidat huntu, a krea oportunidatnan nobo i mas importante ainda, a pone e hubentut di Kòrsou den sentro.
E programa a demostrá ku, ora bo duna hóbennan konfiansa, guia i espasio pa ekspresá nan mes, nan ta tuma inisiativa pa sigui desaroyá nan mes komo lidernan i bira un fuente di inspirashon pa otronan.
Un pabien ta bai na e dos embahadornan, Dee-Seany Winklaar i Nekeshia Stefania, ku a risibí un rekonosementu spesial. Nan tabatin e kurashi pa partisipá den un programa nobo, ku tur e retonan i eksperensianan ku esaki a trese kuné. Ámbos hóben a invertí tempu, energia i dedikashon den e trayekto. Nan a representá e programa ku responsabilidat i entusiasmo. Ademas nan a demostrá ku liderazgo no ta solamente papia, sino tambe skucha, partisipá, inspirá i tuma akshon.
Un programa manera esaki no por a bira realidat sin e sosten di hopi hende. P’esei, ACU ke gradisí tur persona ku a kontribuí na e promé edishon aki. Un danki spesial ta bai na e miembronan di Komishon Fondo pa Hubentut, e kordinadónan, mèntòrnan i fasilitadónan ku a pone nan tempu, eksperensia i rekursonan disponibel.
ACU ta gradisí tambe e famianan i tur esnan ku a motivá i sostené nos embahadornan durante e trayekto. Kada kontribushon, sea grandi òf chikí, a forma parti di e resultado ku a selebrá djabièrnè último.
Komo tabata trata di un promé edishon, tin puntonan di atenshon ku por siña for di nan. E eksperensianan, sugerensianan i retonan ku a presenta durante e trayekto a duna ACU un base importante pa hasi e siguiente edishon ainda mas fuerte, mas inklusivo i mas impaktante. E promé edishon no ta solamente e final di un trayekto; e ta e komienso di un inisiativa ku tin e potensiál pa sigui krese.
ACU lo sigui invertí den nos hubentut i brinda hóbennan oportunidat pa desaroyá nan talentonan, ekspresá nan ideanan i kontribuí na un futuro mihó pa nos komunidat.
Ámbos hóbennan a risibí un premio di Cg. 2.500. Pa Nekeshia Stefania e premio aki a sirbi komo un impulso pa kuminsá su propio negoshi. E tipo di inisiativanan aki ta presisamente loke ACU ke stimulá: hóbennan ku ta mira un oportunidat i ta kapitalisá riba dje.
Na nòmber di Komishon Fondo pa Hubentut, presidente sra. Jacqueline Drenthe ta felisitá e hóbennan i gradisí tur hende ku a hasi e promé edishon aki posibel.
E skolnan ku a partisipá den e programa i a guia e hóbennan durante nan trayekto tambe no a keda afó. UOC i SKAIH a risibí un premio di Cg. 2.500 kada un, komo rekonosementu pa nan partisipashon i e sosten ku nan a duna na e hóbennan durante e programa
“Danki pa boso konfiansa, boso kolaborashon i boso kompromiso. Huntu nos a dal e promé paso. Awor, laga nos sigui traha riba e futuro.” Ku e mensahe aki, sra. Drenthe, presidente di Komishon Fondo pa Hubentut, a sera e promé edishon di e Programa di Embahador, miéntras ku ACU ta reafirmá su kompromiso pa sigui invertí den e hubentut di Kòrsou.
