Minister Boekhoudt presente na apertura di edifisio nobo di Salú pa Tur

WILLEMSTAD – Minister di GMN, Tyron Boekhoudt, tabata presente na apertura ofisial di e edifisio nobo di Salú pa Tur na Willem de Zwijgerlaan 7 na Emmastad.

Salú pa Tur ta brinda kuido di promé liña na personanan ku, pa diferente motibu, no tin akseso na kuido regular. Banda di konsultanan médiko, e organisashon ta enfoká riba prevenshon, detekshon tempran di malesanan, kuido pa malesa króniko, kuido promé i despues di parto i sosten den área sikológiko.

Durante 2025, Salú pa Tur a realisá mas ku 15.000 konsulta pa mas ku 3.000 pashènt. Segun Minister Boekhoudt, e trabou di organisashonnan manera Salú pa Tur ta importante, no solamente pa yega serka hende ku mester di kuido, sino tambe pa prevení ku malesanan ta bira mas serio i asina yuda redusí preshon riba nos sistema di kuido.

Ku e edifisio nobo aki, Salú pa Tur tin su klinika médiko, ekipo di outreach, sosten sikososial i aktividatnan administrativo i di maneho bou di un solo dak. Esaki ta permití mihó koordinashon entre e diferente ekiponan i un uso mas efektivo di rekursonan disponibel.

Minister Boekhoudt a felisita direktiva, personal, boluntarionan, partnernan i donantenan di Salú pa Tur ku e paso importante aki.

“Salú pa Tur ta un partner balioso den nos sektor di kuido. Ora nos logra yega serka hende na tempu, nos ta inverti den prevenshon, pero tambe den un sistema di kuido mas aksesibel i sostenibel. Nos mester sigui traha huntu pa garantisá ku kuido apropiá por yega serka esnan ku tin mester di dje,” Minister Boekhoudt a indiká.