Betèsda ta hasi un paso importante den digitalisashon di kuido

Willemstad, 22 di sèptèmber 2026 – Minister di GMN, Tyron Boekhoudt, tabata presente na Betèsda pa marka un paso importante den e proseso di digitalisashon di e organisashon.

Betèsda a implementá Ysis, un sistema digital pa registrashon i maneho di informashon di kuido. E tratadónan di Betèsda ya tabata traha ku e sistema, i awor e personal di kuido i enfermeria tambe ta pasa di registrashon riba papel pa un sistema kompletamente digital. Di e manera aki, kuido i tratamentu ta bini huntu den un solo sistema.

Minister Boekhoudt a ekspresá su apresio pa e paso aki, ku ta kontribuí na modernisashon di kuido na Kòrsou. Digitalisashon por yuda profeshonalnan di kuido traha mas efisiente, fasilitá akseso na informashon relevante i finalmente laga mas tempu disponibel pa e kuido mes di e kliente.

E minister a felisitá direktiva i personal di Betèsda pa nan kompromiso ku inovashon i mehorashon kontinuo di kuido.
“Modernisá nos kuido ta nifiká tambe invertí den sistemanan ku ta sostené nos profeshonalnan, pa nan por dediká mas tempu na loke ta realmente importante: e persona ku mester di kuido.”