Seguridat na skol ta nifiká mas ku solamente mas kontrol

WILLEMSTAD – “Gobièrnu di Kòrsou ta enfatisá ku seguridat di studiante, dosente, personal no dosente i tur otro profeshonal den enseñansa ta un prioridat. Violensia, menasa i arma no tin lugá pa nan na skol.” Ku e mensahe aki, minister van Heydoorn a habri e reunion importante ku sindikatonan ku a tuma lugá awe, djamars, 22 di sèptèmber 2026, den kuadro di seguridat na skol.

Presente na e reunion tabata minister Shalten Hato, minister Charetti America-Francisca i minister Sithree van Heydoorn (virtual) huntu ku ámtenarnan di e ministerionan respektivo, tim di maneho di Kuerpo Polisial, Sindikatonan Doen, STSK, ABVO i Straf.

E seriedat di e situashon ta eksigí akshon, pero tambe un aserkamentu ku ta dirigí riba loke realmente ta hasi skol mas sigur. Kualke medida ku nos tuma, nos mester puntra nos mes si esaki, realmente ta kontribuí na un skol mas sigur? Mas kontrol i mas medidanan represivo no ta nifiká outomátikamente mas seguridat.”

Skol mester keda un ambiente di pas, rèspèt i konfiansa. Kaminda kòntròl ta nesesario, mester tin kòntròl. Kaminda mester adaptá protokòl esaki mester sosodé i kaminda Polis òf Hustisia mester intervení, e intervenshon mester tuma lugá.  Pero segun e ministernan, e balansa ta importante i nos mester protehá skol sin transform’é den un ambiente kaminda miedu i kontrol ta bira e punto sentral. Skol mester keda un lugá di enseñansa, formashon i desaroyo. Durante di e reunion a informá e sindikatonan di e diferente trayektonan ku ta tumando lugá dor di tur e tres ministerionan relashoná ku e aspekto di seguridat den skolnan. Ta bon pa enfatisá ku trabounan riba seguridat eskolar no a kuminsá despues di e último insidente. Diferente medida i trayekto ya ta andando i otronan den preparashon.

Seguridat eskolar no por keda mirá separá for di e realidat sosial den kua hopi mucha ta krese aden. Komportashon ku ta bira visibel den skol por ta relashoná ku konflikto na kas òf den bario, preshon sosial, situashon familiar, falta di guia òf otro situashon. Esei no ta hustifiká violensia ni komportashon inakseptabel, pero sí ta mustra ku skol no por resolvé e problemanan su so.

Skol no por ta na mes momentu skol, un pòst di polis, un instituto di kuido pa mucha i remplasante di e edukashon ku e mucha mester haña na kas. No por enkargá dosente i personal no dosente ku e solushon di tur problema sosial ku finalmente ta bira visibel den skol. P’esei ministernan a enfatisá ku mester sigui traha huntu pa tin mas seguridat na skolnan i ku konsientisashon ta un parti importante di prevenshon.

Studiantenan mester komprondé ku violensia, menasa i karga arma por tin konsekuensianan serio pa nan mes, pa otronan i pa nan futuro. E proposishon di lei tokante e plan di seguridat na skol ta den su fase final. Pero legislashon ta solamente un parti di e solushon. Un lei por stipulá responsabilidatnan, proseduranan i obligashonnan, esei ta importante, pero un lei so no ta hasi un skol sigur.

Seguridat ta algu ku nos mester konstruí tur dia: den skol, den kas i den nos komunidat.

Despues di presentashon di e tres ministernan, presidente di e sindikatonan presente a kompartí señalnan i eksperensianan di esnan ku ta traha tur dia den enseñansa. Pa gobièrnu tabata importante pa skucha di e sindikatonan relashoná ku loke e personal ta eksperensiá dia aden dia afó. E aporte ta yuda pa evaluá unda medidanan eksistente mester keda fortifiká i kiko mas por hasi adishonal pa fortifiká seguridat na skolnan.

Na final partidonan presente a palabrá ku ta bin un grupo di trabou di ámtenarnan di e ministerionan huntu ku e sindikatonan ku for di mañan, djárason, ta bai reuní pa presentá proposishon di akshon/medidanan ku lo por ser tuma riba término korto.

Pa término kòrtiku, a identifiká e siguiente akshonnan:

1. Registrashon i reportá insidentenan: insidentenan mester keda reportá na Ministerio di Enseñansa, Siensia, Kultura i Deporte (OWCS), Ministerio di Hustisia/Kuerpo Polisial (KPC) i Ministerio di Desaroyo Sosial, Labor & Bienestar (SOAW)/Sektor Famia i Hubentut, ku un evaluashon mensual di e informashon.
2. Programa informativo i preventivo: Kuerpo Polisial lo desaroyá un programa nobo, komparabel ku programanan ku tabatin den pasado, pero adaptá na nesesidatnan aktual di skolnan i hóbennan.
3. Mas visibilidat na skolnan di riesgo: lo fortifiká presensia di outoridatnan na skolnan selektá.
4. Kontrol di tas: skolnan mes lo implementá kontrol di tas komo medida preventivo.
5. Seshonnan informativo: lo organisá seshonnan pa personal di enseñansa, mayornan i alumnonan tokante seguridat, prevenshon, señalnan i responsabilidatnan.
6. ‘Training’ pa dosentenan: lo fortifiká preparashon di dosentenan pa rekonosé señalnan, manehá situashonnan i aktua adekuadamente den kaso di insidente.
7. ‘Drills’ na skol: lo implementá ehersisionan práktiko den skolnan pa prepará personal i alumnonan pa situashonnan di emergensia.

Gobièrnu ta satisfecho ku e forma ku e reunion a desaroyá i tambe ku e palabrashonnan ku a yega na dje i ta gradisí tur esnan ku a partisipá na e reunion aki pa nan disponibilidat i kompromiso ku seguridat na skol. Gobièrnu ta lamentá ku sindikato Sitek no a presentá na e reunion, pero ta konfirmá ku Sitek tambe lo haña invitashon pa partisipá den e grupo di trabou.

Seguridat na skol ta un responsabilidat ku nos ta kompartí i ta importante pa sigui traha huntu na e deseo komun, ku ta pa nos skolnan bira mas sigur pa nos muchanan i pa tur esnan ku ta traha den enseñansa.