Sifranan di turismo durante 2026 i e esfuersonan pa nos isla por karga ku esakinan
Sifranan di turismo durante 2026 i e esfuersonan pa nos isla por karga ku esakinan
WILLEMSTAD – 22 di sèptèmber 2026 – Ministerio di Desaroyo Ekonómiko (MEO), Ofisina di Turismo di Kòrsou (CTB), Curaçao Hospitality and Tourism Association (CHATA) i Curaçao Ports Authority (CPA) a presentá resientemente durante un konferensia di prensa konhunto, e resultadonan di turismo di mitar di e aña 2026. Kada organisashon a presentá 2 aspekto importante: kon e sektor ta desaroyando i kiko e ta hasi pa atendé ku e retonan ku e kresementu ta asentuá riba nos isla.
MEO a pone e resultadonan den un perspektiva mas amplio. E posishon ku nos isla ta den awe ta resultado di hopi aña di esfuerso: a habri aerolínea i rutanan nobo, a atraé hotèl i markanan hotelero nobo i a asta desaroyá merkadonan nobo. E aña akí mundu a mira Kòrsou riba e tereno di futbòl ku “Blue Wave” i riba tereno di beisbòl ku nos kampionnan di Little League, kual sigur tambe tin su efektonan positivo riba e resultadonan ku Kòrsou a bin ta eksperensiá.
Turismo ta un industria nashonal di Kòrsou i no solamente un sektor pa fakansi. E benefisionan ta yega den kada bario, for di e taksista i e operadó di tour te na e restorantnan, e piskadó ku ta bende ku e restorantnan i e hóben ku ta haña su promé trabou den un hotèl. E ekonomia a inkluí tambe e bishitante ku ta keda biba durante algun luna na Kòrsou, e profeshonal ekstranhero ku ta traha for di nos isla, e invershonista i e studiante ku por kontribuí na e otro desaroyonan ku e pais mester ku ta infrastruktura, barionan i fondonan sosial.
MEO a anunsiá tambe ku e estudio di “Carrying Capacity” pa Turismo lo forma e base pa un kuadro di maneho nobo, basá riba “High Value, Low Impact Tourism”. Un vishon nashonal pa turismo lo definí e posishon ku Kòrsou ta deseá komo destinashon den medio i largu plaso i lo determiná e kondishonnan, instrumentonan i responsabilidatnan institushonal nesesario pa logra esaki. Tambe lo desaroyá un “Tourism Satellite Account” pa por hasi un análisis mas eksakto di e impakto ekonómiko ku turismo tin riba nos isla.
CTB na su turno a presentá su kompromiso pa balansá e demanda dor di distribuí e bishita mas bon riba henter e aña i riba henter e isla, dor di atraé bishitantenan ku ta agregá mas balor, sin ku esakinan ta pone mas preshon riba nos medio ambiente, barionan i espasionan públiko ku nos tur ta kompartí. Di e manera aki CTB ke raportá impakto di un manera mas habrí i sigui un plan maestro pa turismo di 5 aña ku ta den desaroyo aworakí ku partisipashon di “stakeholders”.
CHATA a presentá carrying capacity komo un kuadro ku tin 4 dimenshon: medio ambiente, ekonomia, sosial i infrastruktura. A pone hopi énfasis riba e kantidat di awa sushi ku ta keda tratá, hotèlnan nobo den sentro di siudat ku ta konektá na e sistema sentral di trata awa di fekalia i diferente otro lokalidat turístiko ku ta usa e awa gris pa mantené paisahenan bunita.
CPA a presentá e desaroyonan sostenibel na e megapiernan: e pasarela solar, un sistema nobo pa maneho di desecho di awa di fekalia, stashònnan grátis pa yena awa pa redusí uso di plèstik, i e elektrifikashon di Emmabrug i ferry.
Tur e 4 organisashonnan a enfatisá ku e resultadonan positivo mester sigui tuma lugá na un manera responsabel i ku mester sigui hasi esaki huntu. E estudio di carrying capacity, e vishon nashonal, e plan maestro i e kompromisonan propio di e sektor ta forma un solo rumbo: un industria di turismo ku ta sigui logra resultado pa Kòrsou i na un manera ku Kòrsou por biba kuné.
