Simplemente Gibi, Un homenahe na un leyenda… 

 

Simplemente Gibi 

 … Un homenahe na un leyenda… 

 SIMPLEMENTE GIBI – UN HOMENAGE NA GILBERT “GIBI” DORAN  

Ayera, na Curaçao Festival Center, Fundashon Beti Doran a invitá representantenan di  prensa pa un enkuentro speshal. 

Durante e enkuentro, Fundashon Beti Doran, huntu ku su partnernan den organisashon:  CTA Management, Beehives i POSH a presentá mas informashon tokante e gran  

homenahe na Gilbert “Gibi” Doran: Simplemente Gibi. 

E evento ta bai tuma lugá djabièrnè 9 di òktober 2026 na Curaçao Festival Center.  Mercée Doran, di Fundashon Beti Doran, a habri e enkuentro splikando kon e idea pa  honra Gibi a nase. 

Fundashon Beti Doran a aserká CTA Management, den persona di Herman “Manchi”  Harms, i Nathaniel Zoetrum, pa duna un man ku organisashon di e evento. Huntu ku  Beehives nan a forma un team ku ta trahando duru pa presentá un magno evento digno  di Gibi Doran i su legado musikal. 

Un produkshon grandi pa un artista grandi 

Despues di e palabranan di introdukshon di Mercee, Herman “Manchi” Harms a hiba  palabra. 

Manchi a gradisí Fundashon Beti Doran pa e konfiansa depositá den CTA Management.  Pe i su tim ta un honor grandi di por organisá un homenage na bida pa un baluarte  manera Gibi, un artista di ken Manchi mes ta un gran fanátiko. 

Manchi a splika kon e produkshon di Simplemente Gibi ta bai ta. Den sentro di Curaçao  Festival Center ta bai tin un stage grandi harma spesial pa e evento aki, kaminda  diferente banda, músiko i artista ta bai presentá e repertorio musikal di Gibi durante e  anochi. 

Tambe ela presentá e diferente sekshonnan ku lo forma parti di e evento: VIP Tantu Dushi 

E sekshon aki ta situá dilanti di e stage prinsipal, ku Gibi mes sintá meimei di e  invitadonan. Un lugá eksklusivo pa disfrutá e show di serka i selebrá huntu ku e  homenageado. 

VIP Hendenan a Yega 

E VIP aki ta riba e dèk banda di e “stage” tradishonal di Festival Center. Tur e artista i  músikonan ta bai ta riba e stage aki. Kaminda nan ta bai prepará promé ku nan subi  stage prinsipal pa interpretá un di e komposishonnan di Gibi. 

Esnan den e VIP aki ta bai sinti nan mes parti di e ambiente i serka di e artistanan  durante henter e anochi. 

VIP Den bo Hofi 

E sekshon aki ta situá djis patras di VIP Tantu Dushi.  

Un ambiente agradabel, konfortabel i familiar pa disfrutá e shou. 

Sekshon General 

E sekshon general ta konta ku un food court, lugánan speshal pa saka potrèt i un  eksposishon ku imágennan di diferente momentonan den bida i karera di Gibi. Pa esnan ku ta preferá disfrutá e shou sintá, ta bai tin tambe tribuna disponibel den e  sekshon general.

VIP servisio na nivel haltu 

Despues di Manchi, Germain “Chulo” Brunken, di Beehives, a hiba palabra. Chulo a  ekspresá ku pa Beehives ta un honor di por forma parti di e organisashon i hasi algu  speshal pa un di nos artistanan grandi. 

El a splika e opshonnan i servisionan di e diferente sekshonnan VIP. VIP Tantu Dushi: XCG 3.500 pa un mesa di 10 persona, inkluyendo premium drinks,  premium snacks durante henter e anochi i servisio na mesa di e hostessnan di POSH. VIP Hendenan a Yega: XCG 800,- pa un mesa di 4 persona. 

E sekshon aki ta práktikamente “sold out”, solamente sinku mesa a keda disponibel. Den e sekshon aki banda di e ,”stage” di artistanan tin cocktail table ku highchairs pa bo  sinta i bo por skohe bo bòter di premium anto pa kada un hende tin pan ku stoba i sopi. VIP Den bo Hofi: XCG 500,- pa mesa di 4 persona, inkluyendo un cocktail table i bòter  premium na bo preferensia. 

Informashon tokante karchinan General 

E karchinan General di e special di XCG 20, a terminá. Sinembargo, spesialmente pa nos  penshonadonan di 65 aña i mas, e preis di XCG 20,- ta keda disponibel te ku 30 di  sèptèmber. 

Penshonadonan mester presentá nan sèdula pa demostrá ku nan ta 65+ i por kumpra e  karchi spesial aki na: 

24 Uur Uit De Muur, Mensing’s Caminada of Ticketpoint Zeelandia. Pa esnan ku no ta penshonado, karchinan General ta disponibel pa XCG 30,- te ku 30 di  sèptèmber na: 

24 Uur Uit De Muur, Mensing’s Caminada, Ticketpoint Zeelandia, Bugs Bunny Snèk,  Radio Mas i Cherrie Brunch. 

For di 1 di òktober, tur karchi General lo kosta XCG 40,-. 

E eksperensia POSH 

Na nòmber di POSH, Anaiz Visser a splika e servisio ku invitadonan por spera durante e  anochi. 

Ku atenshon personal i e trato eksklusivo di e hostessnan di POSH, kada invitado den e  sekshonnan VIP ta sinti su mes berdaderamente VIP. Pa POSH tambe ta un honor di  forma parti di e evento speshal aki. 

Pa tur informashon i reservashon di VIP, yama POSH na 520-9700. 

Gradisimentu i un sorpresa speshal 

Pa sera e enkuentro, Mercée Doran a gradisí tur patrosinadó ku a duna un man pa yuda  kubri e gastunan haltu di e produkshon. Tambe el a invitá pueblo di Kòrsou pa bin forma  parti di e anochi inolvidabel aki.  

Na final di e evento ta bai tin un sorpresa speshal, kaminda lo hasi un anunsio  importante pa pueblo. 

Ku bo presensia na e evento aki, no solamente bo ta gosa i honra Gibi i su legado, sino  bo ta kontribuí tambe na un kausa bunita ku Fundashon Beti Doran ta anunsiá na final di  e anochi. 

SIMPLEMENTE GIBI  

Mas ku un homenage: un selebrashon di 50 aña di músika, historia i legado. Djabièrnè 9 di òktober 2026 na Curaçao Festival Center. 

Un shou ku bo no por pèrdè!