Gobièrnu ta kumpli ku palabrashonnan i ta kuminsá ku akshonnan konkreto pa seguridat na skol

Willemstad – Entrante djaluna, 28 di sèptèmber 2026, Gobièrnu di Kòrsou lo kuminsá ku implementashon di akshonnan konkreto pa fortifiká seguridat na skolnan, konforme e palabrashonnan hasí ku e partidonan konserní.

Durante e siman ku a pasa, ministernan Hato, America-Francisca i Van Heydoorn, e último partisipando virtualmente, a reuní ku Kuerpo Polisial i ku representantenan di sindikatonan DOEN, STSK, ABVO i STRaF. Djaweps tambe a tuma lugá un reunion ku direktivanan di skol. Den e reunionnan aki a palabrá pa forma un grupo di trabou multidisiplinario, konsistí di ámtenarnan di e ministerionan konserní, representantenan di sindikato i representantenan di direktivanan di skol. E grupo aki lo ser formalisá mediante un Dekreto Nashonal.

Gobièrnu no a warda riba finalisashon di e proseso formal pa sigui aktua. Djaweps mes e grupo di trabou a reuní pa prepará e promé akshonnan konkreto ku lo kuminsá ser implementá entrante djaluna, 28 di sèptèmber.

Akshon 1: Momento di reflekshon durante e promé ora di lès
Tur skol lo dediká atenshon durante e promé ora di lès djaluna na norma i balor, rèspèt, toleransia, prevenshon di violensia, siudadania positivo i responsabilidat konhunto. E intenshon ta pa dialogá ku alumnonan tokante e responsabilidat ku kada un tin pa kontribuí na un ambiente eskolar sigur i respetuoso.

Akshon 2: Mensahe konhunto di e ministernan konserní
Lo sali mensahe di video di e ministerionan di OWCS, SOAW, Hustisia i GMN ku ta dirigí na direktiva di skolnan, dosente i personal no dosente, mayornan i alumnonan. E mensahe lo enfatisá ku agreshon i violensia no ta ser aseptá i ku tur parti tin un responsabilidat den mantené un ambiente eskolar sigur.

Akshon 3. Vigilansia dirigí na skolnan ku un perfil di riesgo elevá
Polis, direktivanan di skol, sindikatonan i gobièrnu a palabrá pa, entrante djaluna, mantené vigilansia adishonal i, kaminda ta nesesario, organisá vigilansia mas dirigí rònt di skolnan ku, a base di kriterio ophetivo, ta ser konsiderá ku un perfil di riesgo elevá.

Akshon 4. Palabrashonnan tokante raportá i duna “follow up”  na insidentenan
Entrante djaluna lo apliká un prosedura uniforme pa reportá insidentenan. Den esaki lo ta definí kua situashon mester ser reportá inmediatamente, na ken mester hasi e reportahe, dentro di kua término i ken ta kordiná e ku e “follow up”.

Akshon 5. Un punto di kontakto visibel pa seguridat eskolar na kada bestür di skol
Kada bestür di skol lo disponé di un punto di kontakto pa asuntunan relashoná ku seguridat eskolar. Di e manera aki, entrante djaluna direktivanan di skol i representantenan di personal lo sa na ken nan por dirigí señalnan, preokupashonnan i situashonnan urgente ku ta rekerí atenshon.

Por menshoná ku Gobièrnu a sigui ku e proseso pa formalisá e grupo di trabou mediante Dekreto Nashonal, konforme e proseduranan vigente. Gobièrnu ke enfatisá ku e palabrashonnan hasí no a keda solamente na nivel di konsulta.

Nan ta ser sigui pa desishon i akshon konkreto. E pasonan ku a ser tuma durante siman pasá i e implementashon ku ta kuminsá djaluna, 28 di sèptèmber 2026 ta demonstrá esaki. Esaki ta solamente e komienso.

E grupo di trabou multidisiplinario lo sigui ku su trabou pa identifiká i implementá otro medidanan konkreto ku por kontribuí na un ambiente eskolar mas sigur pa alumno, personal di enseñansa i komunidat eskolar en general. Tin diferente proposishon mas ku a ser presentá pa implementashon riba término kòrtiku, mediano i largu ku e grupo di trabou lo analisá i konsehá  gobièrnu ariba.

Gobièrnu ta tuma su responsabilidat pa seguridat na skol na serio. Na mes momento, Gobièrnu ta konta ku tur partner envolví inkluyendo sindikatonan, direktivanan di skol, personal di enseñansa i instansianan hudisial pa sigui kontribuí na un manera konstruktivo na e proseso.

Seguridat na skol ta un responsabilidat komun i ta pidi akshon, kolaborashon i kompromiso di nos tur