WILLEMSTAD – Ministerio di Enseñansa, Siensia, Kultura i Deporte (ESKD)su Sektor di Kultura i Deporte, ta informá pueblo di Kòrsou ku Siman di Kultura 2026 a habri ofisialmente. E selebrashon ta kore e aña aki di 27 di sèptèmber te ku 4 di òktober ku e tema “Di Kòrsou pa Mundu”.

E apertura di djadumingu 27 di sèptèmber tabata un éksito. E dia a kuminsá ku un misa kultural na Basílika Santa Ana. Despues e parti ofisial a tuma lugá na Molenplein, Otrobanda. Maestro di seremonia  Sharithee Hironimus a habri e programa, sigui pa e Himno di Kòrsou interpretá pa Jean-Max Rondei. Miss Kòrsou Bianty Roier-Gomperts a kompartí su palabra tokante e tema “Di Kòrsou pa Mundu”. Minister Charetti America-Fransisca a representá Minister di Enseñansa, Siensia, Kultura i Deporte ku un diskurso pa e inougurashon akí.

Durante e seremonia, a duna homenage na Izaline Calister i Urny Florán den representashon di su ruman muhé Rose-Mary Florán. E parti ofisial a kontá tambe ku un shou di Explosion Dancers, Jada van Dijk i X-Tase. Durante atardi i anochi for di 4’or di atardi na Molenplein, Grupo Den Dam, Oriri i Axl & Orchestra ku músika kultural, ku Izaline Calister komo invitado spesial. Na St. Martinus, públiko a partisipá den tayernan i a disfrutá di arte visual, kuenta, poesia i kòmbersashonnan ku Russel Soliana i Percy Pinedo; Isoko, Eduard Reineta, Tittel Del Mar, Kati Qui, Tyson Hill i Crisanta Martha tambe a kontribuí ku nan talento. Na St. Martinusstraat, Kombo Krioyo bou di guia di Hershel Rosario a kompañá, entre otro  Yumarya Grijt i Ike Jesurun den un ambiente ameno ku artesania i produkto lokal. Na Brionplein, dies diferente grupo di baile a subi esenario durante e Festival di Bailenan Folklóriko di SKOBA. Otrobanda tabata un lugá kaminda públiko por a kana di un área pa otro i eksperensiá e rikesa di nos kultura.

Programa den Siman di Kultura

Djaluna 28 di sèptèmber:

• E eksposishon Nos Identidat ta habri na Biblioteka Nashonal Kòrsou, Fokkerweg 17 / Schottegatweg Zuid 36.
• Krioyo Film Festival: Cinemas na Sambil
• BOKA Santonio – 6.30 pm  (tin kontribushon chiki)
• Na Den Adrei di Shishi, Kaya Kané #1, zijweg di Kaminda Venancio Isenia, tin eksposishon, desayuno i kuminda durante dia, i un tayer di kustumber i kerenshanan di antes di 19:00 pa 21:00.

Djamars 29 di sèptèmber:

• Dia di Boka Sami di 10:00 di mainta te 23:00 di anochi, ku músika, baile, arte, aktividat pa hóbennan, deporte riba laman i un selebrashon di parokia.
• Brua Bruhá Krioyo Film Festival: Cinemas na Sambil 6:30 p.m
• Den Adrei di Shishi, Kaya Kané #1, tin aktividatnan durante dia i un tayer di historia di kunuku i kantikanan di trabou di 19:00 pa 21:00.

Djarason 30 di sèptèmber:

• Típiko Pasa Bon na Sambil Curaçao, Veeris #27, 17:00. Na Den Adrei di Shishi, Kaya Kané #1, tin un tayer pa siña traha pan será di ántes di 19:00 pa 21:00.
•  “Malchi su number a hunga” Krioyo film festival : Cinemas na Sambil 6:30 p.m

Djaweps 1 di òktober:

• Eksposishon i aktividatnan na Den Adrei di Shishi, Kaya Kané #1, ku e tayer Ban chèlèlè di 19:00 pa 21:00
• Krioyo Film Festival: Cinemas na Sambil 6:30 p.m  “Mondi ku Ne”    (tin kontribushon)
• Na Hòfi Mani Kwartje 21, Fundashon Museo Ocalia ta presentá 33 aña ta planta. Orario di 9:00am pa 13.00pm.

Djabièrnè 2 di òktober:

• Entrega di sertifikado di Edukashon Kultural [E aktividat aki no ta habrí pa públiko] , Otrobanda, di 17:00 pa 19:00 .
• E aktividatnan na Den Adrei di Shishi, Kaya Kané #1, ta sigui.
•  Krioyo Film Festival: Cinemas na Sambil 6:30 p.m  Dibina (tin kontribushon)
•  Homenage Póstumo na Cedric ridderplaat na Museo Tula

Djasabra 3 di òktober:

• Na Biblioteka Nashonal Kòrsou, Fokkerweg 17 / Schottegatweg Zuid 36, tin estreno di video Pop the Balloon – Siman di Kultura Edition i e panel ku kòmbersashon Nos Kultura pa Mundu, di 17:00 pa 21:00. E eksposishon Nos Identidat por keda bishitá te ku e dia aki. Na Den Adrei di Shishi, Kaya Kané #1, tin aktividatnan durante dia.
• Sentro di bario Soto: Tour den Soto i Besindario Banda Bou pa konose nos historia (tin un kontribushon /5245957) orario ta: 09:00 – 13:00
• Konmemorashon Morto i Rehabilitashon di Tula.19:00 – 22:00 na Parke lucha pa libertat
• Krioyo Film Festival: Cinemas na Sambil 6:30 p.m  ” Kòfi Gratis i Roba Alma” (tin kontribushon)

Djasabra i djadumingu 3 i 4  òktober: Teater Kada ken ku e Obra: “Den mondi di Kabayé” un historia di amistat, libertat i Lealtat. Orario 5:00or pa 6:00or atardi. (tin kontribushon)

Djadumingu 4 di òktober:

• Siman di Kultura ta sera ku un misa di klousura na misa di Soto, 10:00 di mainta. I ta duna apertura na dia di Bandabou den bario di Soto te ku 11:00or anochi, ku presentashon di Oriri, One, Originales, Icons i hopi mas.
• Na Den Adrei di Shishi, Kaya Kané #1, tin un tayer di boutismo di popchi di 16:00 pa 17:00 i un fiesta di boutismo di popchi di 17:00 pa 20:00.
• Krioyo Film Festival: Cinemas na Sambil 6:30 p.m  “Enrico”
•  Sentro Sùr Lumina (patras di misa di Montaña): Seminario Planifikadó Kultural.
•  Dia di Band’abou, Feria i eksposishon di obranan di arte krea den siman kultura

Tin diferent aktividatnan na skol i sentronan di bario kaminda sektor a duna su aporte pa artístanan por hasi traspaso kultural na nos mucha i hóbennan.

Ministerio di ESKD ta invitá pueblo di Kòrsou pa partisipá aktivamente den e aktividatnan di Siman di Kultura, dòrna kas i ofisinanan i dediká e siman akí na nos kultura. Huntu nos ta selebrá nos identidat, nos tradishonnan i nos talento.

Di Kòrsou pa Mundu!