‘Pre-Clearance’ pa biaha ku menor den fakansi di òktober 

KUERPO POLISIAL KÒRSOU 

KOMUNIKADO DI PRENSA

331/2026

30 sèptèmber 2026 

‘Pre-Clearance’ pa biaha ku menor den fakansi di òktober 

Despues di e bon eksperensia ku e servisio di ‘Pre-Clearance’ pa biaha ku  menor’ durante di fakansi grandi di yüli, Kuerpo Polisial Kòrsou ta bolbe ofresé  e servisio aki na públiko pa e periodo di fakansi di òktober 2026. 

For di djaluna 5 di òktober 2026, mayornan i representantenan legal ku tin  intenshon di biaha ku un menor por laga kontrolá e dokumentunan nesesario  pa e biahe promé ku e dia di salida. 

Durante di e ‘Pre-Clearance’, personal di Imigrashon ta kontrolá si e  dokumentunan nesesario pa biaha ku e menor ta kompletu i na òrdu. Si tur  dokumento ta na òrdu, e ‘Pre-Clearance’ lo wòrdu akordá i marká ofisialmente  komo indikashon ku e kontrol a tuma lugá. 

E servisio aki tin komo meta pa duna biaheronan mas siguridat promé ku nan  biahe, evitá problema ku dokumentunan riba dia di salida i na mes momento,  kontribuí na un proseso di kontròl mas lihé i efisiente na aeropuerto. 

Riba dia di biahe, e biahero por presentá e ‘Pre-Clearance’ akordá na personal  di Imigrashon na e punto di kontròl na aeropuerto, di manera ku e proseso di  kontròl por kana mas lihé i mas efisiente. 

Ta importante pa tene kuenta ku e ‘Pre-Clearance’ no ta remplasá e  dokumentunan original ni e dokumentunan ku ta sirbi komo base pa e  outorisashon. Riba dia di biahe, e biahero mester tin tur e dokumentunan  pertinente huntu kuné. Personal di Imigrashon na aeropuerto ta mantené e  posibilidat di kontrolá e dokumentunan si esaki ta nesesario.

SIRBI I PROTEHÁ 

Departamentu di Komunikashon i Prevenshon Página 1 

Pa hasi uso di e servisio di Pre-Clearance, ta importante pa trese e  dokumentunan ku ta aplikabel na bo situashon, entre otro: 

• Dokumentunan di biahe bálido; 
• E formulario ‘Biaha ku Menor’, debidamente yená; 
• Buki di kasamentu òf ekstrakto ekstenso (‘lange uittreksel’) for di registro di  nasementu, si ta aplikabel; 
• Deklarashon di outorisashon pa biaha, si ta aplikabel; 
• Desishon di gezag òf tutela (‘gezag- of voogdijbeschikking’), si ta aplikabel; 
• Otro dokumentunan menshoná den e foyeto informativo ‘Biaha ku Menor’,  dependiendo di e situashon. 

Kuerpo Polisial Kòrsou ta konsehá mayornan i representantenan legal pa hasi  uso di e servisio gratis aki ku sufisiente tempu promé ku fecha di salida.  Si durante e Pre-Clearance resultá ku falta un dokumento òf ku un dokumento  mester wòrdu kompletá, drechá òf renová, e biahero ainda tin tempu pa pone  esaki na òrdu promé ku dia di biahe. 

E servisio di ‘Pre-Clearance’ ta disponibel na ofisina prinsipal di Kuerpo Polisial  Kòrsou na Winston Churchillweg, Rio Canario, durante di e siguiente  orarionan: 

Djaluna pa djaweps: 09:00’or – 13:00’or 

Djabièrnè: 09:00’or – 12:00’or 

E servisio lo ta disponibel durante e periodo di fakansi di òktober 2026. 

Ku e servisio di ‘Pre-Clearance’, Kuerpo Polisial Kòrsou ke sigui kontribuí na un  mihó preparashon di biahe, un proseso di kontròl di salida mas efisiente i un  eksperensia mas trankil pa mayornan, representantenan legal i menornan.