Homenage Póstumo na Ced Ride a yena Museo Tula ku  músika, rekuerdo i alegria 

Willemstad– Un anochi yen di alegria, rekuerdonan, músika i apresio pa un gran yu di Kòrsou.  Asina por deskribí e Homenage Póstumo na Ced Ride, ku a tuma lugá djabièrnè 2 di òktober na  Museo Tula, Landhuis Kenepa. Den un mensahe di Jeanne Henriquez direktor di Museo Tula, ku  no por tabata presente, el a hasi un yamada riba tur esnan interesá pa kontribuí pa organisá un  ripitishon di e evento den un forma mas grandi, pa tuma kontakto ku e fundashon.  

Interes pa e evento tabata asina grandi ku for di djarason organisashon mester a sera reservashon,  despues ku a alkansá e kapasidat máksimo. E homenage tabata parti di e inisiativa di direktiva di  Museo Tula pa pone enfoke riba personanan ku nan obra i aporte a laga un marka importante den  komunidat i kultura di Kòrsou. E eskoho di Ced Ride tabatin un nifikashon spesial, ya ku e lema  

ku Museo Tula ta usa durante henter 2026, “Ta Yu’i Kòrsou nos ta”, ta inspirá pa su  komposishon “Ta Yu di Kòrsou Mi Ta”. 

Maestro di seremonia Glenn Thomas a habri e anochi ku palabranan di bon biní, pa despues  Shurbey Alberto presidente di Fundashon Museo Tula tambe duna palabranan di gradisimentu. E públiko presente por a eksperensiá un programa ku a mustra diferente faseta di Ced Ride: e  artista, e kompositor, e defensor di Papiamentu i kultura, pero tambe Ced komo amigu i ser  humano. 

Chris Peterson, amigu di Ced Ride, a para ketu na diferente ehèmpel kon Ced semper tabata  dispuesto pa defendé nos kultura i nos idioma. Su aporte a duna esnan presente un bista personal  riba e konvikshon ku Ced tabatin pa preservashon i duna balor na loke ta di nos. 

Eksperto linguístiko Martha Dijkhoff a profundisá den e rikesa di Ced Ride su obranan analisando su komposishon “Den Kòrsou tin un P”. Asina e públiko por a para ketu na e uso di  Papiamentu i e mensahe den su komposishonnan. 

Músika, naturalmente, tabata un parti importante di e homenage. Farley Lourens a interpretá  algun di Ced Ride su hitnan mas popular, entre otro “Balada di Buchi Fil” i “Ta Yu di Kòrsou  Mi Ta”.  

Ced Ride mes “presente” durante e anochi 

Un di e momentonan spesial tabata e dokumentario prepará pa Ernesto “Tico” Vos. Den esaki,  Ced Ride mes ta papia tokante investigashon ku el a hasi riba e nòmber original di nos isla i e  nifikashon ku tin tras di esaki. E dokumentario a permití e públiko tende Ced mes konta di su  investigashon i su interes profundo den historia i identidat di Kòrsou.

Morgan Isenia a sigui ku un kompilashon di grabashonnan di Ced Ride, den kua e artista ta  konta, ku e humor ku tabata karakteris’é, tokante diferente eksperensia di su bida i kon algun di  esakinan a inspir’é pa yega na sierto komposishon. 

E momento aki a resultá partikularmente emoshonal i alabes alegre. E manera natural i  humorístiko ku Ced tabata papia den e grabashonnan a zona asina real, ku pa algun momento  esnan presente por a sinti manera Ced tabata atrobe meimei di nos, kontando su kuentanan  manera semper. 

Banda di tur esakinan, esnan presente por a wak diferente kuadro ku Ced a pinta, algun di su  publikashonnan i tambe premionan ku el a gana. 

E parti kultural di e programa a sigui ku Grupo di Baile Harmonia i Goso, ku a presentá,  agregando ainda mas koló i tradishon na e anochi. 

Palabranan spesial di señora viuda di Ced Ride 

Un momento íntimo di e anochi tabata na momentu ku e señora viuda di Ced Ride, Mary Bikker a dirigí palabra. El a gradisí tur hende ku a bin pa honra Ced, pero tambe a para ketu na e  amigunan ku tabata parti di su bida. 

El a konta kon Ced tabata un persona ku gustosamente tabata invitá hende na nan kas, i a  kompartí rekuerdonan kon Ced tabata biba i skirbi su músika. Su palabranan a duna e públiko un  bista di Ced no solamente komo e artista konosí, sino tambe komo esposo, amigu i e persona tras  di su obra. 

Despues di un anochi kaminda palabra, historia, baile, humor i músika a topa otro, Grupo Ekis a  sera programa ku algun balada, poniendo final na un homenage ku a selebrá Ced Ride den e  manera ku ta kuadra ku su legado: ku kultura, músika, Papiamentu i alegria. 

Fundashon Museo Tula ta gradisí tur persona ku a asistí na e homenage, e famia di Ced Ride, tur  oradó i artista, i tur esnan ku di un manera òf otro a kontribuí na realisashon di e anochi. 

E gran interes di públiko, ta mustra ku obra i legado di Ced Ride ta sigui biba den kurason i  memoria di nos komunidat pasó: ‘Ta Yu’i Kòrsou nos ta’.