Direktiva ke enfatisá ku e proseso pa yega na un Lider di Partido mester kana limpi, transparente, korekto i imparsial, kaminda tur miembro ta haña mesun trato i oportunidat igual.

Willemstad, 5 òktober 2026

Direktiva ke enfatisá ku e proseso pa yega na un Lider di Partido mester kana limpi, transparente, korekto i imparsial, kaminda tur miembro ta haña mesun trato i oportunidat igual.

Direktiva a tuma nota di ekspreshonnan hasí dor un miembro di Partido Nashonal di Pueblo na un emisora pa ku un otro miembro di Partido. Direktiva ta haña esaki inaseptabel i ta kontra e espiritu  di e ideologia Kristian Demókrata ademas ta violá garafalmente Partido su normanan i moral: Órden Desensia i Disiplina. 

Asta e deklarashon a bai asina leu di difamá un miembro di partido ku ta den e kontienda pa Lider di Partido, i ta duna sosten na un otro persona ku tambe ta den e kontienda pa Lider di Partido.

Direktiva ta desaprobá i distansiá totalmente for di e deklarashonan nan ei, i ta konsidera ku e deklarashonnan a wordu hasí a título personal i no ta representá posishon di Direktiva.

Direktiva lo no drenta den un diskushon públiko, ni interno entre miembronan, pero ta hasi un yamada na tur interesado pa mantené rèspèt mutuo i pa evitá deklarashonnan ku por pone na duda na imparsialidat, integridat òf bon desaroyo di e proseso.

Direktiva lo sigui kumpli ku su responsabilidat pa savalguardiá e 5 prinsipionan di Demókrata Kristian; Konfiansa den Ser Supremo, Hustisia sosial, Solidaridat, Responsabilidat kompartí, Subsidiaridat, Plurarismo i Mayordomismo, igualmente pa garantisá ku e proseso ta sigui su kurso den un manera ordená, transparente i ku rèspèt pa tur persona involukrá.

Direktiva

PNP