KUERPO POLISIAL KÒRSOU 

KOMUNIKADO DI PRENSA

339/2026

4 òktober 2026 

Intento di atrako ku konfiskashon di arma di kandela 

Djasabra 3 di òktober 2026 alrededor di 20.26’or, Sentral di Polis a risibí  informashon ku un atrako a kaba di tuma lugá riba un kantor di number riba  Kaya George Willems. 

Mesora a dirigí unidatnan na e sitio i na yegada di e promé patruya, el a  komprondé di un testigu ku un ratu promé algun hòmber a bini na e kantor  di number i trata na tira un atrako. 

Nan a destruí e porta di e kantor, pero no a logra bai ku nada. 

Durante di nan huida, pistol a kai for di un di nan.  

Un siudadano atento a kue e arma di kandela i a entregá esaki na polis. Investigashon den e kaso ta kontinuá.