{𝐑𝐚𝐚𝐝 𝐯𝐚𝐧 𝐄𝐮𝐫𝐨𝐩𝐚 𝐝𝐢 𝐛𝐢𝐬𝐡𝐢𝐭𝐚 𝐧𝐚 𝐒𝐃𝐊𝐊}

Djaluna 5 di òktober 2026, SDKK – Sentro di Detenshon i Korekshon Kòrsou a risibí bishita di un delegashon di Council of Europe, den kuadro di nan bishita di trabou na Kòrsou.

Durante e bishita, e delegashon a risibí un presentashon tokante funshonamentu di SDKK, e diferente departamentunan i e trabou ku ta tuma lugá diariamente den kuadro di detenshon, kuido, seguridat i resosialisashon.

Despues di e presentashon, e delegashon a hasi un rekorido den diferente parti di e institushon. Entre otro, nan a bishitá FOBA, kaminda a duna informashon tokante e kuido i atenshon ku ta wòrdu brindá na detenidonan ku mester di sosten i guia spesialisá.

Tambe e delegashon a bishitá Vreemdeling Opvang Detentie Curaçao (VODC), kaminda nan a haña oportunidat pa mira e fasilidatnan i risibí informashon tokante e manera ku detenshon di estranheronan ta organisá na Kòrsou.

E bishita a brinda oportunidat pa interkambio di informashon, eksperensia i punto di bista tokante diferente aspekto di sistema di detenshon. Atenshon a bai tambe pa e importansia di seguridat, kuido, trato digno, resosialisashon i rèspèt pa derechonan humano den un ambiente di detenshon.

Bishitanan di trabou manera esaki ta kontribuí na diálogo i koperashon internashonal, i ta brinda oportunidat pa sigui evaluá i fortifiká e trabou ku ta tuma lugá den sistema di detenshon na Kòrsou.