{𝐂𝐨𝐮𝐧𝐜𝐢𝐥 𝐨𝐟 𝐄𝐮𝐫𝐨𝐩𝐞 𝐝𝐢 𝐛𝐢𝐬𝐡𝐢𝐭á 𝐧𝐚 𝐊ò𝐫𝐬𝐨𝐮}

Mi a inisiá e siman aki ku un kombersashon balioso ku koleganan di Council of Europe. Mi a papia ku Clare Ovey, Direktor di Derechonan Humano, i Clare Brown, Hefe di Divishon den e departamento ku ta supervisá kumplimentu ku sentensianan di Korte Europeo pa Derechonan Humano.

Mi kolega, Minister di Salúbridat, Medio Ambiente i Naturalesa, Tyron “Ty” Boekhoudt a partisipá virtualmente den e kombersashon.

Nos a papia, entre otro, tokante kondishonnan di detenshon i kuido di salú mental pa personanan kondená pa bida largu, desaroyo di kuido forénsiko, uso di violensia den detenshon i akseso di detenidonan na asistensia hurídiko.

Ademas, nos a papia tokante kon Raad van Europa por sostené Kòrsou di forma práktiko den e proseso di reforma i mehorashon kontinuo di nos sistema penitensiario. Un kombersashon enfoká riba mehorashonnan konkreto i un sistema di detenshon kaminda seguridat, kuido (sikiátriko), rehabilitashon i dignidat humano ta bai man den man.