WoMen Steering Committee Curaçao ta konmemorá 52 aña di eksistensia onrando boluntarionan ku Steering Award 2026

 

WoMen Steering Committee Curaçao ta konmemorá 52 aña di eksistensia onrando boluntarionan ku Steering Award 2026

Willemstad, 15 di òktober 2026

WoMen Steering Committee Curaçao (WSCC) ta konmemora su di 52 aniversario komo un momento speshal pa reflehá riba mas di mei siglo di kompromiso ku empoderashon, edukashon, desaroyo sosial i fortalesementu di hende muhé, hende hòmber i famia den nos komunidat.

E selebrashon ta tuma lugá na e sala di resepshon di ABVO, kaminda WSCC ta reuní su gruponan afiliá, invitadonan i representantenan di nos komunidat pa konmemorá e aniversario i lo onra personanan ku ta duna un kontribushon balioso na nos pais.

Un di e momentunan speshal di e anochi ta e entrega di Steering Award 2026, un rekonosementu na personanan ku, riba base boluntario, ta dediká nan tempu, energia i talento na bienestar i desaroyo di nos komunidat.

Gruponan afiliá na WSCC a proponé nominadonan. Un kuerpo di hurado independiente a evaluá e nominashonnan pa selekshoná e ganadó prinsipal di Steering Award 2026.

Durante e selebrashon, WSCC ta entregá tambe un plaka di rekonosementu na Grupo Mama Kòrsou, komo apresio pa nan inisiativa original pa introdusí Steering Award. E inisiativa aki a bira un tradishon anual ku ta sigui onra e kontribushon di boluntarionan na nos komunidat.

Segun presidente di WSCC, Miriëta P. Lourens-de Lanoy, e aniversario ta mas ku un selebrashon.

“Durante 52 aña, WSCC a sigui traha pa fortalesé nos komunidat. Nos ta onra no solamente e damanan ku a pone e fundeshi di nos organisashon, sino tambe e personanan ku tur dia ta hasi un diferensia den bida di otro. Nos boluntarionan ta un forsa importante den desaroyo di nos pais.”

WSCC ta enfatisa ku boluntarismo, solidaridat, rèspèt i responsabilidat sosial ta balornan fundamental pa konstruí un komunidat mas fuerte.

Ku e selebrashon aki, WSCC ta reafirmá su kompromiso pa sigui promové formashon, empoderamentu, partisipashon sosial i kolaborashon entre generashonnan. “Huntu nos por logra mas. Huntu nos por sigui transformá nos komunidat”, sra. Lourens – de lanoy a klousurá bisando.