E iniciativa nacional “Make Aruba Pink” ta un campaña masiva di conscientisacion y accion na nivel di henter nos isla, organisa por la Fundacion ABO a traves di su programa nacional de deteccion de cancer di pecho.. Su obhetivo principal ta subraya e importancia de  prevencion y la deteccion tempran di cancer de pecho mediante realisacion di mamografia y chekeo regular.

Bou di e lema: “Ros ta mas cu consenshi. E ta un recordatorio pa haci bo screening” e campaña ta busca transforma mensahe tradicional pasivo di salud den accion comunitario directo.

Apoyo y envolvimento di henter e isla

Como parti di e iniciativa, Ministerio di Relacionnan den Reino, Enseñansa, Hubentud, Innovacion y Deporte  ta participa hunto cu Stadion Guillermo Prospero Trinidad den haci Aruba ros.

Ministerio ta haci un yamada na tur cabesante di scol, docente, personal administrativo, studiante y cas di famia pa uni na e movemento aki door di:

• Bisti na ros durante luna di october;
• organisa actividadnan educativo tocante salud y bienestar;
• reflexiona y hiba combersacionnan habri tocante deteccion trempan y cuido preventivo.

“Educacion ta e herment mas poderoso pa trece cambio y conscientisacion den nos sociedad. Ora nos ta educa nos hobennan y nos comunidad riba e importancia di cuida salud y detecta malesa na tempo, nos ta salba bida. Mi ta invita tur nos scolnan y instancianan educativo pa bisti ros y demostra cu Aruba ta uni den solidaridad cu e sobrevivientenan, e pacientnan y e famianan cu ta pasa den e proceso aki,” Minister di di Relacionnan den Reino, Enseñansa, Hubentud, Innovacion y Deporte Gerlien Croes a declara.

Kibra tabu y salba bida

E campaña “Make Aruba Pink” ta recorda e comunidad cu deteccion trempan ta haci un gran diferencia. Promove e combersacion aki den ambiente escolar y familiar ta yuda kibra tabu y encurasha un estilo di bida consciente y saludabel for di un edad trempan.

Minister di Relacionnan den Reino, Enseñansa, Hubentud, Innovacion y Deporte Gerlien Croes ta expresa gratitud y reconocemento na tur e fundacionnan, profesionalnan di salud, y boluntarionan cu ta traha incansabelmente pa hiba e mensahe di conscientisacion den tur skina di Aruba.