APC Bank ta hinka su klientenan eksistente den problema finansiero
Nos di “KIKO TA PASANDO” a risibi e informashon aki via di email.
APC Bank ta hinka su klientenan eksistente den problema finansiero
Kiko ta pasando na APC Bank?
Pakiko klientenan mester warda di lunanan te kasi mitar aña pa risibi un desishon tokante nan hipotek pa konstrushon, mientras ku nan ta sufri konsekuensianan finansiero grave?
Un hipotek pa un tereno sin kas tin gastunan mensual i tasa di interes mas haltu ku un hipotek pa un tereno ku kas.
Mientras ku APC no ta tuma un desishon, klientenan ta sigui paga gastunan haltu, mientras ku e preisnan di konstrushon ta sigui subi.
Durante lunanan, a pidi APC pa tuma un desishon, ofresé un solushon, kompensashon of un freeze temporal di e pagonan, pero sin resultado.
E banko ta bisa ku no por duna un timeframe pa motibu di kambio interno.
Pakiko klientenan mester karga e konsekuensianan finansiero di problemanan interno di nan mes banko? Un kliente ku ta kumpli ku su obligashonnan tin derecho di spera un desishon denter di un periodo rasonabel.
Kambia pa otro banko tampoko ta fasil.
Banda di un boet haltu pa paga e hipotek prome ku tempu (early repayment), tin gastunan adishonal pa kansela e hipotek aktual i registra un hipotek nobo na Kadaster via di notario.
A pidi APC pa dispensa e boet i duna kompensashon pa e retraso, pero e banko ta keda ketu.
Asina, klientenan ta keda pega!
Keda ku APC ta nifika sigi paga gastunan haltu, mientras ku kambia pa otro banko ta trese gastunan adishonal i un boet.
Esaki no ta solamente un petishon di hipotek ku ta tuma demasiado tempu.
Esaki ta trata di klientenan ku ta kai den problema finansiero paso nan banko no ta tuma un desishon.
Kon un banko por spera ku su klientenan kumpli ku nan obligashonnan finansiero, si e mesun banko ta kontribui na nan problema finansiero dor di no tuma un desishon?
APC BANK, TUMA UN DESISHON!
NO LAGA BO KLIENTENAN SUFRI.
OFRESE UN KOMPENSASHON PA NAN POR BAI OTRO BANKO!
Kiko Ta Pasando i Excellence Production ta distansia su mes for di e kontenido di e texto aki.
Nos a risbi e texto aki den nos email.
Nos di “Kiko Ta Pasando” tin informashon di e persona ku a manda e informashon aki.
