Cultuurfonds ta presentá wèpsait informativo/históriko tokante bario di Korsou: www.rais.cw

Cultuurfonds ta presentá wèpsait informativo/históriko tokante bario di Korsou: www.rais.cw

Kòrsou awor tin un wèpsait ku informashon amplio tokante orígen di (nòmber) di bario, historia, personahe i evento remarkabel ku a tuma lugá den nos barionan. Tur esaki ta riba e wèpsait “Rais di mi Pais” ku ta ‘online’ entrante 22 di òktober 2026 riba e plataforma DigitALL di Stichting Cultuurfonds Caribisch Gebied (CCG). CCG ta spònser prinsipal di e proyekto ku a keda ehekutá pa Fundashon Famia Núkleo di Bario pa loke ta produkshon di teksto i fotografia i B-Smart ku ta enkargá ku konstrukshon di e wèpsait.

Presentashon di e wèpsait dia 22 di òktober ta un ‘soft launch’ ku e promé 100 barionan na Kòrsou. Tur estén konstrukshon di e wèpsait lo sigui ku demas barionan te na komienso di 2027, ora lo hasi e lansamentu ofisial.

Meta prinsipal di e proyekto ta edukativo: hopi bario na Kòrsou orígen di nan nòmber, unda nan ta keda òf suseso ku a tuma lugá einan ta deskonosí serka gran parti di nos poblashon.

Mediante entrevista ku habitante (di edat) i kompilashon di loke tin skibí kaba a purba yega na un dokumentashon mas kompletu posibel di kada bario.

Komo medio edukativo e informashon ku “Rais di mi Pais” ta ofresé, ta balioso tambe pa nos hubentut, pues ta hasi invitashon na skol i otro instituto edukativo pa subi e wèpsait pa buska informashon i kompartí esaki.

Tambe tin tres dokumental riba e wèpsait tokante bario di Tera Kòrá, Scharloo i Mahuma, ku ta produkshonnan anterior di Fundashon Famia Nukleo di Bario ku a keda patrosiná pa Unesco Curaçao.

Pa motibunan práktiko aworakí e wèpsait ta disponibel na Ingles i Hulandes. Den un siguiente fase lo tradusí e wèpsait na Papiamentu. E tradukshon na ingles a keda di spònser pa e kompania B-Smart.

Pues un invitashon kordial na pueblo di Kòrsou pa bishitá e wèpsait, siña konosé nos isla i nos barionan mas mihó i tambe komentá i agregá informashon òf susesonan ku no a wòrdu menshoná ainda òf indiká persona klave i konosí den bario ku por duna kontribushon pa asina sigui engrandesé su balor informativo.

E bestür di Fundashon Famia Nukleo di Bario ta yama danki di kurason na tur ku a duna aporte pa hasi e wèpsait aki posibel, primeramente na nos spònser prinsipal CCG i tambe B-Smart.

Pa akseso na wepsait: www.rais.cw

Pa informashon adishonal tokante e proyekto Rais di mi Pais òf pa duna informashon pa sigui engrandesé e wèpsait, por tuma kontakto ku sra. Mylène Luisa na number di telefòn òf Whatsapp 5999-569 2296.