Empleadonan di VVRP i MEO ta partisipá na torneo di sòftbòl SKAK na Aruba

Willemstad – Un tim di sòftbòl konhuntamente formá pa empleadonan di Ministerio di Tráfiko, Transporte i Planifikashon Urbano (VVRP) i Ministerio di Desaroyo Ekonómiko (MEO) ta partisipá na e torneo di sòftbòl SKAK na Aruba. E torneo aki ta trese partisipantenan den un ambiente deportivo, kaminda kolaborashon, spiritu di tim i kompañerismo ta pará sentral.

Partisipashon di e tim konhunto aki a bira posibel danki na e sosten balioso di diferente sponsor. Ku nan kontribushon finansiero i material, e sponsornan a yuda e empleadonan pa por representá Kòrsou i nan respektivo ministerionan durante e evento deportivo aki.

P’esei, e tim VVRP/MEO ta ekspresá su profundo gratitut i apresio na tur sponsor ku a depositá nan konfiansa den e tim i a brind’é nan sosten.

Un palabra speshal di danki ta bai na e siguiente sponsornan:

• Core,
• Curinde,
• Curoil,
• Curaçao Tourist Board (CTB),
• Curaçao Airport Holding (CAH).

Sosten di e organisashonnan aki ta bai mas leu ku solamente un kontribushon finansiero. Ku nan aporte, nan ta stimulá deportividat, union i un spiritu di tim positivo entre empleadonan.

Pa e partisipantenan, e torneo ta representá tambe un bunita oportunidat pa fortalesé e kolaborashon entre ámbos ministerio i pa mantené kontakto ku koleganan di den region.

E tim di softball VVRP/MEO ta partisipá ku hopi entusiasmo den e torneo i ta sinti su mes orguyoso di por representá Kòrsou ku sosten di su sponsornan.

Na nòmber di tur hungadó i organisadónan, nos ta bisa un danki di kurason na tur sponsor ku a hasi e eksperensia deportivo aki posibel!

Huntu nos ta mas fuerte, tantu na trabou komo riba tereno di sòftbòl!