KUERPO POLISIAL KÒRSOU 

KOMUNIKADO DI PRENSA

368/2026

25 òktober 2026 

Akshon kontra vehíkulonan bieu riba kaminda públiko 

Djasabra 24 di òktober 2026 entre 09.00’or i 14.00’or, personal di warda di  polis di Rio Canario, bou di guia di “Buurtregisseur”, asesorá pa e tim di  mantenshon di VVRP, a tene un akshon den kua a deshasí di un kantidat di  vehíkulo bieu stashoná riba kaminda públiko. 

A konsentrá riba garashinan i otro kompanianan den entre otro e bario di  Kanga/Dein, Krusada Bahamasweg/Haitiweg i e krusada  Haitiweg/Cubaguaweg. 

Na Dein, doño di e garashi mes a kita 4 vehíkulo ku tabata riba kaya riba  òrdu di polis i un (1) vehíkulo a keda kitá dor di polis riba gastu di e doño. Na e sitio a repartí 3 prosès-verbal pa vehíkulonan di kua nan  dokumentunan no tabata na òrdu. 

Na un adrès riba e krusada Haitiweg/Bahamasweg, varios vehíkulo bieu a  keda kitá dor di e doño mes, despues ku anteriormente el a risibí atvertensia. 

A enkontrá na e adrès ei tambe dos kachó ku tabata deskuidá. Esakinan a  keda tumá dor di e inspektor di keho ku a hiba nan e Departamentu di  Asuntunan Veterinario. 

Riba Haitiweg a repartí prosès verbal tambe pa un shofùr maskulino ku  tabata manehá un vehíkulo di kua su dokumentunan no tabata na òrdu. E shofùr a keda detené tambe pa motibu di violashon di e lei di opio.

Na un adrès riba Cubaguaweg, algun vehíkulo bieu a keda kitá riba gastu di  e doño, ya ku esakinan tabata riba kaminda públiko i di kua e doño no a  kumpli ku e atvertensia. 

Polis ta hasi un apelashon riba siudadanonan i doñonan di garashi ku tin  vehíkulonan ku sea temporalmente òf definitivamente no ta wòrdu usá mas, pa no laga esakinan riba kaminda públiko òf visibel for di kaminda  públiko. 

Polis lo kontinuá ku e akshonnan aki i si durante di kontròl e vehíkulonan  aki ta permanesé ainda riba kaminda públiko, esakina lo wòrdu kitá riba  gastu di e doño kombiná ku un but pa violashon di lei aki. 

Laga nos realisá ku aparte di e bista sumamente desagradabel ku e  vehíkulonan bieu aki riba kaminda públiko ta sòru p’e, nan ta forma un  peliger pa tráfiko i salubridat públiko, ya ku nan ta fuente di sangura, djaka  i otro animalnan.