Minister di Hustisia den diálogo ku komunidat asiátiko tokante seguridat i prevenshon di kriminalidat

WILLEMSTAD, 25 di òktober 2026 – Den kuadro di e kasonan resien di atrako ku a tuma lugá na diferente negoshi asiátiko na Kòrsou, Minister di Hustisia, mr. Shalten Hato, huntu ku Tim di Maneho di Kuerpo Polisial Kòrsou (KPC), a sostené un enkuentro ku representantenan di Chinese Business Association Curaçao i Curaçao Chinese Community Club.

E enkuentro a tuma lugá riba petishon di Minister di Hustisia, mr. Shalten Hato, ku a tuma e inisiativa pa reuní ku representantenan di komunidat asiátiko, skucha nan preokupashonnan i dialogá tokante e situashon di seguridat relashoná ku e insidentenan kriminal resien.

Durante e enkuentro, Minister Hato i Tim di Maneho di KPC a dialogá ku e representantenan tokante e situashon aktual, medidanan di prevenshon i e importansia di un koperashon estrecho entre polis i komunidat pa prevení i kombatí kriminalidat.

Atenshon spesial a bai pa e nesesidat di sigui fortalesé komunikashon entre e empresarionan i KPC, stimulá medidanan preventivo den i rondó di negoshinan, i fomentá e disponibilidat di komunidat pa kompartí informashon ku por kontribuí na investigashonnan polisial.

Minister Hato a enfatisá ku seguridat di tur habitante i empresario na Kòrsou ta di gran importansia, sin distinshon di nashonalidat òf orígen. Tur persona mester por biba, traha i hasi negoshi den un ambiente sigur, sin miedu di bira víktima di kriminalidat. Durante e diálogo, a indiká ku KPC ta sigui traha intensivamente riba e kasonan di atrako ku a tuma lugá. E investigashonnan ta sigui aktivo, ku enfoke riba identifikashon i detenshon di personanan envolví den e aktividatnan kriminal aki. E yamada na komunidat ta pa sigui kolaborá ku polis, reportá aktividatnan sospechoso i kontribuí na un ambiente mas sigur pa tur hende.

[FIN DI KOMUNIKADO]