40 kas afektá pa kandela den promé nuebe luna di 2026

WILLEMSTAD – Den kuadro di e luna di Prevenshon di Kandela, Kuerpo di Brantwer Kòrsou ta ekspresá su preokupashon tokante e kantidat di kandela ku a tuma lugá durante e promé nuebe luna di 2026. Di yanüari te ku sèptèmber 2026, un total di 40 kas, 16 establesimentu i 3 resort a keda afektá pa kandela. E sifranan aki ta suprayá e importansia di prevenshon i konsientisashon den nos komunidat.

Segun e sifranan ofisial di Brantwer Kòrsou, durante e promé tres kuartal di 2026 (Q1 te ku Q3), e kuerpo a atendé un total di 1.025 insidente. Di e total aki, 546 tabata relashoná ku kandela, di kual 46 tabata kandela interno i 485 kandela eksterno. Ademas, a registrá 15 otro tipo di kandela. Riba tereno di dunamentu di servisio i asistensia, Brantwer Kòrsou a atendé 451 kaso, di kual 381 tabata servisio i 70 tabata asistensia. Tambe a registrá 28 alarma falsu.

Brantwer Kòrsou ta enfatisá: Prevenshon ta un responsabilidat di nos tur

Mirando ku nos ta aserkando e último lunanan di aña, Brantwer Kòrsou ta pone énfasis èkstra riba e importansia di prevenshon di kandela i seguridat den nos komunidat. Brantwer Kòrsou ta hasi un yamada na tur habitante i doñonan di negoshi na Kòrsou pa evaluá nan propio situashon di seguridat, identifiká posibel riesgonan di kandela i tuma e medidanan preventivo nesesario pa protehá nan kas, famia, negoshi i propiedat.

Atenshon spesial mester bai na uso sigur di aparatonan i instalashonnan eléktriko, eliminá situashonnan ku por kousa kandela, instalashon di detektornan di huma (rookmelders) i un aparato pa paga kandela adekuá. Un kandela por surgi den algun sekònde, pero su konsekuensianan por ta enorme. P’esei ta importante pa kada persona ta konsiente di e peligernan den su propio ambiente i aktua na tempu pa prevení insidentenan.

“Kada kandela ku nos por prevení ta un kas, un famia òf un bida ku nos por protehá. Prevenshon ta e mihó opshon.” Brantwer Kòrsou ta enfatisá ku prevenshon di kandela no ta solamente responsabilidat di Brantwer, sino un responsabilidat di nos tur. Kada persona tin un papel importante den identifikashon i redukshon di riesgonan. Brantwer Kòrsou ta reafirmá su kompromiso pa sigui kontribuí na seguridat di nos komunidat, tantu den kombatimentu di kandela komo den prevenshon i konsientisashon. Un komunidat mas sigur ta kuminsá ku responsabilidat i akshon preventivo di kada un di nos.

[FIN DI KOMUNIKADO]