RIB’E LUGÁ TA DRENTA SU ÚLTIMO SIMAN DI REGISTRASHON

WILLEMSTAD – Tim di Rib’e Lugá ta informá públiko en general ku e trayekto di Rib’e Lugá a drenta su último siman di registrashon. E último dia pa registrá ta djasabra, 31 di òktober 2026.

Pa por apliká pa e trayekto di Rib’e Lugá, e persona mester tabata presente na Kòrsou promé ku 13 di novèmber 2025 i mester kumpli ku e rekisitonan aplikabel. Nos ta hasi un yamada na tur persona ku ainda no a registrá, pero ku ta konsiderá ku nan ta kumpli ku e eksigensianan, pa hasi nan registrashon promé ku e fecha final. Muchanan tambe por registrá. Den e trayekto di Rib’e Lugá, menor di edat tin prioridat.

Si dado kaso ta den espera di un dokumento rekerí, por kuminsá registrá i na momento ku tin e dokumento por manda esaki via mail na info@ribeluga.cw.

Registrashon pa e proyekto Rib’e Lugá por tuma lugá di e siguiente maneranan:

• Online: Via e página web ofisial ribeluga.cw.
• Asistensia di IOM: Por traha un sita na IOM na Otrobanda, Hoogstraat 18-22, via e siguiente link: https://immigrationcur.org/es/afspraak-voor-hulp/ kaminda por risibí asistensia grátis pa kompletá e proseso di registrashon.
• Registrashon personal na Servisio di Atmishon: Djasabra, 31 di òktober 2026, lo ta e último dia di registrashon. Personanan interesá por presentá personal na e edifisio di Servisio di Atmishon den Punda pa hasi nan registrashon.

Nos ta rekomendá tur persona interesá pa no warda te último momento pa registrá. Ta importante pa sigui e instrukshonnan indiká i pa entregá e informashon i dokumentashon nesesario di forma korekto. Tim di Rib’e Lugá ta gradisí tur persona ku a pone nan konfiansa den e trayekto i ta invitá tur persona ku ainda no a registrá pa tuma akshon awor i hasi uso di e oportunidatnan disponibel promé ku e periodo di registrashon sera definitivamente.

Pa mas informashon por subi www.ribeluga.cw òf por bèl/ WhatsApp na +599 9 511 9984.