Minister van Heydoorn ta interveni: Peloteronan hóben ta na promé lugá

Djasabra 31 di òktober Minister Sithree van Heydoorn a reuní ku District Administrator di Little League
sr. Urny Floran, representante nan di Liga Pabou i di e organisashon Otrobanda Pioneers.

A yama tur partido na mesa pa skucha di nan kiko ta e motibunan ku a kondusí na un diferensiá di opinion i interpretashon di reglanan di Little League, ku por tin reperkushon pa e hóbennan pelotero.

Durante di e reunion partidonan a trese nan puntonan dilanti i minister a hasi diferente pregunta aklaratorio. Minister a pidi partidonan pa bai di akuerdo ku un komishon di tres ku lo skucha partidonan un biaha mas, nan lo analisá tur dokumento i tambe reglanan di e organisashon madre di Little League i ku den un término di dos (2) siman lo bin ku un konseho ku mester kondusí na solushon di e problema ku a surgi.

E komishon di tres tin komo miembro
Hubert “Berti” Braam (Abogado),
Cindy Jozefa Dorego (Senior Manager – SOAB) i
Curtley “G-no” Valerian (Deportista i Dosente na ICUC).

Manera ya menshoná denter di dos (2) siman lo tin un konseho di parti di e komishon, miéntras tantu minister van Heydoorn ta pidi e tres organisashonnan, pero tambe mayornan pa apstené nan mes di kualkier akto ku por empeorá e situashon.

Ban laga sano huisio prevalesé i ban pone interes di e hóbennan pelotero na promé lugá.
Ta nos deber pa kuida e ramo di deporte aki, ku a logra títulonan meritorio pa nos Dushi Kòrsou.