AVB a instalá un FAD na “Banki” na Banda Abou 

AVB a instalá un FAD na “Banki” na Banda Abou 

Willemstad – Riba Djamars 27 di òktober Departamentu di Maneho Agrario i Peska (ántes LVV) di Ministerio di GMN, a instalá un bui pa atrahé piská (Fish Aggerating Device (FAD)) djis pafó di Banki na altura di Porto Marie- Daaibooi.

 

Ya ta konosí ku Ministerio di GMN durante e añanan ku a pasa a instalá un gran kantidat di FAD’s den e awanan di Kòrsou.

E inisiativa aki ta un gran éksito i e buinan aki ta yudando e piskadónan imensamente i diariamente nos piskadónan ta saka gran kantidat di piská for di lamán, prinsimpalmente buní pero tambe entre otro dradu, mulá, grastèlchi di lamán i balaú. 

 

Riba 25 di febrüari 2026 un FAD ku a keda instalá na Banki for di aña 2017, a lòs bai i Minister enkargá ku Sektor di Agrikultura, Medio Ambiente i Naturalesa, Sr. Gilmar Pisas, a ekspresá e deseo pa remplasá e FAD aki. 

 

Riba Djamars 27 di òktober 2026 un tim di eksperto a baha e FAD na Banki riba un profundidat di 2.100 pia (~640 meter) na posishon 12˚12.2550’ N, 69˚06.4826’ W, ku ta djis Sùit di Banki.

Manera tur e FAD’s ku Gobièrnu a baha den laman e FAD aki tambe ta ekipá ku lus ku ta sende anochi, radar reflector i AIS pa yuda guarantisá seguridat di navegashon i evitá dalmentu di barkunan. AIS (Automatic Identification System) ta un “tracking system” ku barkunan sa uza pa transmití i risibí informashon tokante barkunan den bisindario. Komo e FAD ta ekipá ku AIS ta minimalisá e chèns pa barkunan dal den dje.  

 

E bahamentu di FAD’s ta parti di maneho di Gobièrnu pa sostené sektor di peska i halsa seguridat alimentisio di pais. Lo sigui ku e programa di FAD aki pa semper tin un kantidat di FAD operashonan den nos laman. Gobièrnu ta hasi un apelashon na tur esnan ku lo bai piska na e FAD pa hasi esaki na un manera responsabel, sin kousa daño na e FAD.  

1 Pòrtrèt di e boto i e bui, e kabuyanan i anker.

2 Pòrtrèt di e team ku a instalá e FAD na Banki. Pòrtrèt Faisal Dilrosun