Minister Pisas ta haña presentashon di Fundashon Resiklá Glas

Minister Pisas ta haña presentashon di Fundashon Resiklá Glas

Willemstad – Fundashon Resiklá Glas (FRG) resientemente a duna Minister Gilmar Pisas enkargá ku sektor di medio ambiente i naturalesa, un presentashon relashoná ku nan plan pa bini ku un planta spesial pa resiklá glas. Direktor Ehekutivo di e kompania señora Endirah Palm a duna splikashon ekstenso di e plannan pa establesé e kompania, ubikashon i e prosesonan ku ta tuma lugá pa transforma bòter den materia prima ku nos lo por uza pa diferente meta.

Pa logra kolektá mas glas ku ta posibel, FRG lo ofresé un servisio di kolekshon ku kontainernan spesial pa glas pa negoshinan den sektor di horeka manera, hotèl, restorant, café, toko, snèk, truck di pan, beachclub i demas negoshinan i sektornan ku ta produsí gran kantidat di glas komo desecho.

FRG su enfoke ku ta sentrá riba servisio, kual ta konsistí den ofresé kontainernan spesial pa glas na negoshinan di horeka, ku posibilidat pa rekohé glas ora mester, ademas di e servisio regular di kolekshon segun un planifikashon fiho. Habitantenan di nos isla tambe lo por hasi uzo di e kontainernan grandi pa glas, kual lo wòrdu ubiká na diferente punto di kolekshon na Kòrsou. Esaki lo bai huntu ku inisiativanan di stimulashon (incentives) pa enkurashá partisipashon. Sin embargo, e atenshon prinsipal lo sigui ta riba e grupo mas grandi kual ta sektor empresarial.

E glas ku wòrdu kolektá lo no wòrdu eksportá. E glas ku keda kolektá lo wòrdu prosesá i reutilisá aki na Kòrsou mes komo un alternativa limpi i di kalidat haltu pa remplasá santu di riu ku nòrmalmente ta wòrdu importá. E material aki por tin un amplio tereno di aplikashon den diferente sektor di ekonomía di nos isla kual alabes lo produsí vários kupo du trabou pa nos hendenan. FRG tin e intenshon pa kuminsá ku e kolekshon di glas den e di tres kuartal di aña 2027. Pa kualke informashon adishonal por tuma kontakto ku FRG via mail adres: palm@resikla.org