Ministerio di Salubridat, Medio Ambiente i Naturalesa ta uni pa… Operashon Siman Santu 2023

Willemstad – Djaluna mainta 3 di aprel último durante di un rueda di prensa ku a tuma lugá na Ministerio di Salubridat, Medio Ambiente i Naturalesa na Colon a anunsiá e kolaborashon i koperashon di e diferente ministerionan di gobièrnu i organisashonnan privá ku ta uní huntu pa durante Siman Santu garantisá órden públiko i seguridat na playanan, riba laman, riba nos kareteranan i kosta di Kòrsou.

 

Operashon Siman Santu (OSS2023) su lema e aña aki ta ‘Un Siman Santu den pas, union i harmonia’ i ta bira operashonal djaweps dia 6 di aprel próksimo i ta finalisá djaluna dia 10 di aprel 2023 basá riba palabrashonnan mutuo, koperashon boluntario i estrecho di su aktornan. Atrabes di añanan Operashon Siman Santu a demonstrá ku e kolaborashon di tur aktor ta sumamente importante pa garantisá seguridat, limpiesa i órden públiko durante e fin di Siman Santu.

Aktornan ku lo traha huntu durante Operashon Siman Santu ta:

• Kuerpo Polisial (KPC): Mantenshon di órden públiko, implementashon di Sero
  Toleransia, libertat di tráfiko, asistensia na stakeholders, Tim di Montaña, Barber,
  Punda i Otrabanda.
  ●  Brandweer (BWC): Seguridat di kandela i kontròl den esaki. Seguridat preparativo
  i preventivo.
  ●  Ministerio di GMN: Kontròl riba benta i higiena di kuminda (THZ), kontròl i limpiesa
  riba playanan i área bishitá (AVB), kontakto ku piskadónan, kordinashon di OSS
  2023, barí di karbon, petishon pa kamper riba playa, kontròl riba playanan,
  kordinashon en general di playanan, slipways,  na Sta Cruz i Daaibooi, buinan
  den awa, flotnan den awa, hindervergunning (MNB). Infrastruktura di edifisionan di
  gobièrnu na playanan;  aksesibilidat di kamindanan pa e playanan.
  ●  Ambulans (FKAK): Kuido di ambulans. Duna kuido asistensia na momentu di
  emergensia.
  ●  Kustwacht den koperashon ku Citro: Órden, vigilansia i seguridat riba laman i
  kosta zùit.
  ●  Ofisina di Turismo (CTB): optimalisá seguridat na diferente playa públiko i
  atrakshon turístiko. Ta kontribuí pa por tin tualèt portátil na diferente playa públiko
  i di parti di CTB tin dos persona ku lo kontrolá na diferente playanan i
  atrakshonnan turístiko tantu parti pariba komo pabou. Tur e akshonnan aki ta na
  benefisio di tantu nos pueblo lokal i e turistanan ku ta di bishita riba nos pais
  durante e temporada di Siman Santu.
  ●  Politur: duna asistensia kual ta enserá ku nan lo patruyá di forma mas frekuente
  na áreanan di konsentrashon i duna asistensia na turista kaminda ta nesesario.

  ●  Inspekshon di Ministerio di Desaroyo Ekonómiko: Kontròl riba aspektonan manera
  pèrmit di negoshi, indikashon di preis, orario di operashon pa ku negoshi,
  propósito di negoshi, kumplimentu ku lei nan ekonómiko.
  ●  Selikor: rekohé shushi den kònteiner, pone tualètnan portátil konforme
  palabrashon, konsientisá públiko pa tene nos playanan limpi, konsientisá
  doñonan di wikènthùis pa atendé di forma responsabel ku nan shushinan.
  ●  Krus Kòrá: duna promé asistensia.
  ●  Janthiel Security: Seguridat den área di Janthiel, Brakkeput i Sint Joris.

  Metanan di e proyekto di OSS2023 ta pa garantisá entre otro:
  ●  Limpiesa i mantenshon di playanan públiko.
  ● Kontròl riba benta di alimento konforme reglanan di higiena i pèrmitnan eksistente.
  ●  Seguridat di turistanan i personanan lokal na playanan públiko i áreanan turístiko.
  ●  Redusí robo i atrako na nos playanan.
  ●  Fasilitá i intermediá ku piskadónan na e diferente playanan pa evitá
  inkumbiniensia.
  ●  Órden Públiko riba karteranan ku ta bai Bándabou i Caracasbaai.
  ●  Aksesibilidat via di kayanan pa playanan públiko.
  ●  Palabrashonnan nesesario i kumplimentu di esakinan bou di e stakeholdernan.
  ●  Duna informashon i konsientisá bishitantenan i públiko en general.

Nos grupo di enfoke ta pueblo en general, personanan ku ta bai kamper (keda drumi) na playanan, personanan ku ta bai landa na nos playanan, personanan ku boto i/òf seadoo, personanan ku ta bai sambuyá i snòrkel, nos piskadónan i turistanan.

Pa mas ampliashon di e informashonnan aki, bishitá nos páginanan di Facebook, Ministry of Health Enviornment & Nature Curaçao.
Ban pasa : “Un Siman Santu den pas, union i harmonia”.