TREMENDO KLOUSURA DI E KAMPAÑA DI COCA-COLA, FFK I VOLKSWAGEN CURAÇAO; BO T’UN KAMPION ORA BO RESIKLÁ!
Federashon Futbòl Kòrsou, Coca-Cola i Volkswagen Curaçao a uni forsa ekstendiendo un invitashon na tur ekipo di futbòl huntu ku nan fanatikada pa resiklá i alabes kontribuí na nan ekipo pa medio di un kompetensia di resiklahe.
Tur ekipo ta tin entre promé di novèmber pa 22 di dezèmber 2023 pa demostrá ku nan por presta riba vèlt i tambe pafó di dje kolektando mas tantu shushi resiklabel posibel i alabes gana premionan atraktivo pa nan ekipo. Tur e shushinan ku a keda kolektá a wòrdu pisá i registrá pa Green Phenix ku lo bai duna nan un di dos bida komo produktonan nobo.
Kada ekipo por a risibí pa kada 10 kilo di produktonan resiklabel kolekshoná, un lòt ku chèns pa gana diferente premio di fl.250,- i un premio grandi di fl.1000,- ku a suma un total di fl. 4750,- na premio ku e ekiponan ku a partisipá por a gana.
Den e siman tras di lomba den Stadion Rignaal ‘Jean’ Francisca, representantenan di Coca-Cola, FFK i Volkswagen Curaçao a hasi entrega di un sertifikado di partisipashon i tambe e diferente premionan di e ekiponan ku a partisipá i ta tei presente na e klousura di e tremendo kampaña aki. Tur presente a disfrutá di un ratu ameno pero yen di suspenso en espera di e ekipo ku lo a bai ku e premio grandi. E ekipo ganadó di e kampaña aki a resultá; Atlétiko Saliña ku a kolektá mas shushi i a bai ku a título máksimo. Banda di e premio grandi, e siguiente ekiponan a gana un òf mas lòt den forma di sèn pa nan ekipo; Atletiko Saliña, Subt, Jong Holland, Victory Boys, Excellence School, Scherpenheuvel, Inter Willemstad i Centro Juve.
FFK ta sumamente kontentu ku su ekiponan por a partisipá na e bunita kampaña aki, gana premio i mas ku klaro yuda tene nos isla limpi i bunita!
Coca-Cola, FFK i Volkswagen Curaçao ke stimulá un i tur pa ban sigui resiklá i duna produktonan di plèstik un di dos bida, debí ku e ta un material sostenibel ku nos por hasi hopi kuné na lugá di djis tira afó. Un pabien na tur ekipo ku a partisipá i gana, keda pendiente pa mas kampaña kaminda abo i nos mundu lo benefisiá for di dje!
3 aprel 2022
