FRAKSHON DI PAR TA SOLIDARIO KU MARILYN ALCALÁ- WALLÉ.

FRAKSHON DI PAR TA SOLIDARIO KU MARILYN ALCALÁ- WALLÉ.

 

Willemstad, 

 

Frakshon di Partido Alternativa Real (PAR) ta sostené su miembro Drs. Marilyn Alcalá- Wallé, ku a disidí di entregá su retiro komo minister di enseñansa, siensia, kultura i deporte (ESKD), enbista di e ultimo desaroyonan den e kua Ministerio Públiko a indiká di lo bai kuminsá un investigashon penal kontra dje.

 

Den e forma ku nos por a spera di dje, na momento ku Sra. Alcalá- Wallé a tuma nota di e intenshonnan di Ministerio Públiko, el a bai entregá su retiro inmediatamente na Gobernador, pa despues notifiká Promé Minister Rhuggenaath di su desishon. 

 

Frakshon di PAR ta respetá e desishon di Sra. Alcalá- Wallé i ta rekonosé tambe e outoridat di Ministerio Públiko, ku konforme e sistema hudisial di nos pais, ta hunga un papel fundamental den mantenshon di e balansa den nos prosesonan demokrátiko. 

 

Frakshon di PAR ta ta gradisí Sra. Alcalá- Wallé pa su balentía i dedikashon inkondishonal na su trabou komo e minister di mas trayektoria (dos aña ku ocho luna) di e eksistensia di nos hoben pais. Durante su temporada komo minister di ESKD, Sra, Alcalá- Wallé a atendé ku varios reto masha grandi, pa trese òrden i struktura bèk den un ministerio ku a kai atrás bárbaramente pa motibu di e instabilidat ku tabata reina eiden pa motibu di e kambionan frekuente di liderato den e último añanan. P’esei nos frakshon ta lamentá profundamente ku e sirkumstansianan aktual mester kondusí un biaha mas na interupshon di un maneho koherente ku netamente Sra. Alcalá- Wallé a bin ta traha riba dje. 

 

Frakshon di PAR tin tur konfiansa ku, unabes e proseso investigativo konkluí, Sra. Alcalá- Wallé lo bolbe na su puesto pa e sigui ku su labornan na benefisio di su ministerio en partikular i pueblo di Kòrsou en general.