Den un Mundu Digital, Tur Hende Tin Un Papel den dje: Kòrsou Ta Pone Alfabetisashon di Media i Informashon den Spotlight huntu ku UNESCO

Den un Mundu Digital, Tur Hende Tin Un Papel den dje: Kòrsou Ta Pone Alfabetisashon di Media i Informashon den Spotlight huntu ku UNESCO

 

WILLEMSTAD. Komishon Nashonal di UNESCO Curaçao, RAC i UNESCO su Ofisina Regional pa Karibe a organisá 2 dia di tayer “hybrid” den kuadro di Siman Global di Alfabetisashon di Media i Informashon (Media and Information Literacy  (MIL) di UNESCO 2026: Konstruyendo un Sosiedat Mas Informá, Krítiko i Responsabel.

Komo ku teknologia digital, medionan sosial i inteligensia artifisial ta influensiá mas i mas kon hende ta komuniká, siña i tuma desishon, e importansia pa konsientisá riba e tema akí ta mas grandi ku nunka. A organisá e tayer komo un evento sekundario di UNESCO Global MIL Week 2026, kaminda a trese atenshon na e nesesidat pa siudadanonan di tur edat desaroyá e abilidatnan nesesario pa nabegá e medio ambiente di informashon di awendia di un manera seif, kritiko i responsabel.

Kiko ta Alfabetisashon di Media i Informashon (MIL)?

Alfabetisashon di Media i Informashon (MIL) ta referí na e konosementu i abilidatnan ku hende mester pa haña akseso, komprondé, evaluá, krea i kompartí informashon den un forma responsabel. E ta yuda individuonan distinguí echonan for di opinionnan, rekonosé informashon falsu òf engañoso, kuestioná e konfiabilidat di fuentenan online i komprondé kon medionan di komunikashon i plataformanan digital ta influensiá loke nan ta mira, lesa i kere.

Den palabranan simpel, MIL ta siña hende pa no kere tur loke nan mira òf lesa online, pero pa pensa krítikamente, verifiká informashon y konsiderá e konsekuensianan promé ku kompartí esaki. E abilidatnan akí ta spesialmente importante den un era kaminda inteligensia artifisial por generá imágennan, videonan i mensahenan konvisente ku por ta difísil pa distinguí for di kontenido outéntiko.

Dikon MIL Ta Importá pa Kòrsou?

Miéntras ku Kòrsou ta sigui ku su transformashon digital, MIL ta birando un habilidat di bida esensial, no solamente pa studiantenan y edukadornan pero tambe pa mayornan, profeshonalnan, funshonarionan públiko, periodistanan y komunidat en general.

 

E tayer a enfatisá ku tur hende tin un responsabilidat pa kontribuí na un ambiente di informashon di konfiansa. Skolnan por siña pensamentu krítiko, mayornan por guia muchanan den nan uso di medionan digital, periodistanan por promové reportahe eksakto, i siudadanonan por yuda prevení plamamentu di mal informashon pa medio di verifiká informashon promé ku kompartí esaki. 

Instansianan lokal manera Banko Sentral di Curaçao i St. Maarten, Ministerio di OWCS, Komishon Nashonal di Kòrsou, Servisio Meteorológiko di Kòrsou, Fundashon Alton Paas, Amor Lumen Foundation, Eksperto riba Género, i online a partisipá Komishon Nashonal di Aruba, Media Institute of the Caribbean (MIC), University of the West Indies, Centre for Law and Democracy na Canada, un profeshonal riba informashon i teknologia i Cybersecurity, CARIFORUM Intellectual Property Rights and Innovation (CarIPI), UNESCO Paris i Ofisina Regional di Karibe. 

 

Temanan ku a elaborá ariba ta Un “Timeline” di Transformashon  Digital na Kòrsou, Konstrukshon di Konsientisashon di MIL pa Tur Hende, Hóbennan, Profeshonalnan i Personanan Vulnerabel, Mehorá Bo Abilidatnan di Konta Kuenta i Komunikashon,Konstrukshon di Inklushon Digital den Karibe di Habla Hulandes, Konstrukshon di MIL pa Preparashon pa Kalamidat, Respuesta i Rekuperashon, Siman Global di MIL di UNESCO i MIL den Karibe, Konsientisashon di Siberseguridat, Derechinan di Propiedat Intelektual di Kreativonan Karibense,  Seguridat Online i Protekshon di Aparátonan, Konstrukshon di Alfabetisashon Finansiero i Evitando Presentashon di Froude i Estafa Finansiero i finalmente presentashonnan di Violensia di Género i Seksual i Konstrukshon di Pas Fasilitá pa Teknologia.