Krioyo Film Foundation ta brinda 109 studiante oportunidat pa disfruta di pelikula na Papiamentu

Krioyo Film Foundation ta brinda 109 studiante oportunidat pa disfruta di pelikula na Papiamentu

WILLEMSTAD, 4 di novèmber 2026 – Den kuadro di e di tres edishon di Krioyo Film Festival 2026, Krioyo Film Foundation a organisá un aktividat spesial pa studiantenan di dos skol sekundario na Kòrsou. Djamars 3 di novèmber, 109 studiante i 8 dosente a bishitá Caribbean Cinemas den Sambil.

Maristella VSBO a partisipá ku 56 studiante i 2 dosente; St. Paulus VSBO ku 53 studiante i 6 dosente.

Durante e bishita, e studiantenan a mira tres produkshon na Papiamentu: Lanta ‘Riba di Sendion Balentin di Boneiru, ku entre otro Amos Balentin den e aktuashon; Ki te plan di Rody Welvaart; i Kaya ta nos Arena di Ramses Petronia.

E aktividat a kombiná entretenementu ku edukashon kultural, brindando e hóbennan oportunidat pa mira nos idioma i nos komunidat representá riba pantaya grandi. Krioyo Film Foundation ta konsiderá esaki un invershon den futuro di nos kultura i nos industria cinematográfiko.

Pa hasi partisipashon posibel pa tur hende, Krioyo Film Foundation a kubri e gastunan di transporte, hur di sala di sine, popcorn i limonada pa e partisipantenan. E inisiativa a bira posibel danki na sosten di partnernan i fondonan, entre otro Nederlands Filmfonds.

E dos skolnan a pasa un tremendo dia i a disfruta di tres produkshon ku balor edukativo. Krioyo Film Foundation ta gradisí e skolnan, dosentenan, Caribbean Cinemas i tur partnernan ku a kontribuí na e aktividat.

Krioyo Film Foundation ta aspirá pa sigui kolaborá ku skolnan, pa mas hóbennan por konosé e produkshonnan cinematográfiko di nos region i haña inspirashon den e mundu di sine.

Pelikula na Papiamentu ta nos kos!