Inspekshon pa Salubridat Publiko ta ordená botikanan pa keda habrí durante e orario stipulá pa lei
Salubridat Públiko, Medio Ambiente i Naturalesa
Inspekshon pa Salubridat Publiko ta ordená botikanan pa keda habrí durante e orario stipulá pa lei
Publiká riba 04 Novèmber 2026
ANUNSIO
Willemstad, 4 di novèmber 2026
Inspectie voor de Volksgezondheid (IVG) a imponé un aanwijzing awe, 4 di novèmber 2026, na botikarionan i doñonan di botika. Nan mester habri i mantené nan botikanan habrí pa públiko konforme e orario di apertura stipulá pa lei.
Inspekshon a tuma nota ku botikanan a sera nan portanan pa públiko durante e akshon ku nan ta realisando dia 4 di novèmber. Den e kuadro aki, ta referí na e dos botikanan ku segun e dienstrooster ta di servisio. Durante henter dia, pashèntnan lo mester buska nan remedi pa malesanan króniko i remedi di urgensia na e dos botikanan di servisio.
Botikario ta ehersé su profeshon konforme e reglanan stipulá pa lei. Botikario tin e obligashon di sigurá ku e personanan ku ta traha den botika ta kumpli ku e reglanan aki.
E obligashon aki ta konta tambe pa doño di botika, kende segun e apotheekvergunning mester kumpli ku e reglanan stipulá pa lei.
E orario di apertura i sera di botikanan públiko ta regulá pa lei, pa garantisá ku semper tin sufisiente oportunidat pa haña remedi.
Botikanan públiko mester ta habrí di 8:00 di mainta te 19:00 di anochi. Di 19:00 di anochi te 8:00 di mainta, i riba djadumingu i dianan ku segun lei ta ekivalente na djadumingu, dos botika ta di servisio, un na kada banda di Sint Annabaai, segun un dienstrooster prepará pa Ministerio di Salubridat, Medio Ambiente i Naturalesa (GMN).
Keda sin habri un botika durante e orario di apertura stipulá pa lei ta un violashon di e reglanan stipulá pa lei. Esaki tin komo konsekuensia ku no tin sufisiente oportunidat pa públiko haña remedi.
Tantu botikario komo doño di botika ta responsabel pa kumpli ku e orario di apertura stipulá pa lei. Pa e motibu aki, Inspekshon a imponé un aanwijzing na ámbos.
No kumpli ku e aanwijzing por tin komo konsekuensia ku Inspekshon ta imponé un last onder dwangsom pa pone fin na e violashon.
Inspekshon lo sigui monitoriá kumplimentu ku e orario di apertura stipulá pa lei i, si ta nesesario, lo tuma medidanan adishonal.
