RAC TA KONFIRMÁ KU INVESTIGASHON DI BOTIKANAN NUNKA A KUMINSÁ PA FALTA DI DATONAN DI VAE
Salubridat Públiko, Medio Ambiente i Naturalesa
RAC TA KONFIRMÁ KU INVESTIGASHON DI BOTIKANAN NUNKA A KUMINSÁ PA FALTA DI DATONAN DI VAE
Publiká riba 05 Novèmber 2026
ANUNSIO
Publiká 5 di novèmber 2026
Willemstad – Vereniging van Apotheek Eigenaren (VAE) a deklará resientemente den medionan di komunikashon ku nan a suministrá sifranan pa un investigashon di Regulatory Authority of Curaçao (RAC) tokante e kompensashon pa kada recept médiko (receptregelvergoeding). Minister di Salubridat, Medio Ambiente i Naturalesa (GMN) a pidi RAC formalmente pa duna un reakshon, ku e ophetivo di trese klaridat den e deklarashonnan di VAE. Den su reakshon di awe, RAC ta kontradesí e deklarashon di VAE.
Segun RAC, na 2024 a kuminsá kombersashonnan ku VAE tokante un investigashon di preis di kosto i efisiensia den sektor di botika. E ophetivo tabata pa determiná un kompensashon hustifiká pa kada recept médiko, basá riba datonan aktual i verifikabel.
Dia 11 di aprel 2024, RAC a manda VAE un proposishon pa e investigashon, inkluyendo e datonan nesesario, manera kuentanan anual (jaarrekeningen), datonan di produkshon, informashon di personal i informashon tokante e struktura di gastu i entrada di botikanan.
Dia 15 di aprel 2024, VAE a konfirmá ku nan a risibí e proposishon i a komprometé nan mes pa reakshoná mas pronto posibel. Despues di un rekordatorio di RAC dia 8 di mei 2024, segun RAC, VAE no a bolbe duna ningun reakshon sustansial riba e proposishon di investigashon.
Dia 5 di desèmber 2024, VAE a hasi opheshon kontra entrega di kuentanan anual i kontra inkluí e entradanan di drogisterij den e investigashon. Ministerio di GMN a bolbe informá VAE ku e sifranan anual ta esensial.
RAC a indiká ku e datonan nesesario pa ehekutá e investigashon nunka a ser entregá na RAC. Esaki ta nifiká ku te awe e kooperashon nesesario di sektor di botika no a tuma lugá.
Komo konsekuensia, e investigashon planifiká tokante preis di kosto i efisiensia no por a tuma lugá. RAC ta enfatisá ademas ku no tin ningun investigashon ku ta den proseso kaba pa vários aña i ku RAC ainda mester finalisá.
Basá riba esaki, Minister di GMN ta mantené e prinsipio ku ta konta pa tur proveedó di kuido médiko: un adaptashon di tarifa òf presupuesto di kuido médiko ta posibel solamente basá riba un investigashon independiente di RAC, ku sifranan verifikabel, pasobra ta trata di fondo públiko.
“Asina ku botikanan entregá e datonan finansiero i demas informashon ku RAC a solisitá, e investigashon por kuminsá,” segun Minister Boekhoudt.
